Ministrja e Arsimit, Arbërie Nagavci ka thënë se ora e parë e mësimit, ditën e premte i është kushtuar temës për personat me aftësi të kufizuara, përcjell InLajmi.
Nagavci bashkë me përfaqësues të Handikos kanë vizituar shkollën ‘’Qamil Batalli’’ në Prishtinë ku kanë bashkëbiseduar me nxënësit të cilët ishin të gatshëm të ndihmojnë personat me aftësi të kufizuara.
Ajo i ka cekur disa nga veprimet që qeveria e Kosovës i ka ndërmarrur sa i përket aftësisë së kufizuar: Qeveria në vitin 2022 ka shpallur Vit të Aftësisë së Kufizuar, shtimi i 500 asistentëve për fëmijët me aftësi të kufizuara, etj.
Ministrja e Arsimit gjithashtu shtoi se nuk do të mungojë asnjëherë përkushtimi ndaj fëmijëve duke i’u ofruar qasje të barabartë dhe arsim cilësor.
Postimi i plotë i saj:
Sot shënohet Dita ndërkombëtare e personave me aftësi të kufizuar.
Me vendimin tim, në të gjitha shkollat e Kosovës, të premten ora e parë e mësimit i është kushtuar kësaj teme me qëllim vetëdijësimin e nxënësve mbi të drejtat e personave me aftësi të kufizuara.
Në linjë me këtë, bashkë me përfaqësues të Handikos vizituam dje shkollën “Qamil Batalli”, në Prishtinë ku morëm pjesë në një orë mësimore në të cilën mësuesja po trajtonte temën e Aftësisë së Kufizuar.
Nga bashkëbisedimi me nxënës e kuptova se secili prej tyre janë të gatshëm të ndihmojnë personat me aftësi të kufizuar dhe se sa e rëndësishme është kjo ndihmë.
Si Qeveri e Republikës së Kosovës kemi ndërmarrë disa veprime sa i përket aftësisë së kufizuar.
Fillimisht, vitin 2022 Qeveria e ka shpallur Vit të Aftësisë së Kufizuar.
Vitin 2023 do ta permbyllim me 500 asistentë për këta fëmijë.
Kemi ndarë buxhetin për Sintezën Vokale për personat e verbër e cila mund të përdoret nga viti i ardhshëm.
Po ashtu jemi në proces të akreditimit të programit për aftësimin e personave që njohin gjuhën e shenjave.
Si Ministri e Arsimit mbesim të përkushtuar që të gjithë fëmijëve t’u ofrojmë qasje të barabartë e arsim cilësor./InLajmi/
