Asociacioni i komunave me shumicë serbe po vazhdon të mbetet si çështje kyçe në dialogun mes Kosovës dhe Serbisë, pasi Bashkimi Evropian dhe Shtetet e Bashkuara të Amerikës ia kanë bërë të qartë Qeverisë së Kosovës se nuk do të ketë marrëveshje të tjera pa e themeluar Asociacionin, shkruan InLajmi.
Në lidhje me çështjen e Asociacionit dhe “presionit ndërkombëtar” që po i bëhet Qeverisë së Kosovës, ka folur për InLajmin analisti politik Milazim Krasniqi, i cili kërkesën e BE-së dhe SHBA-së për formimin e Asociacionit e vlerëson si “presion pozitiv” për ecjen përpara në procesin e dialogut.
Krasniqi theksoi se ky është një obligim ndërkombëtar, të cilin Kosova e ka marrë në përcjelljen e Brukselit.
“Kërkesat e zyrtarëve amerikanë dhe evropianë për formimin e bashkësisë së komunave serbe padyshim që janë në kuadër të një presioni “pozitiv” lidhur me ecjen përpara në procesin e negocitave mes Kosovës dhe Serbisë. Pra, ata po instistojnë në formimin e Asociacionit sepse është një obligim ndërkombëtar, të cilin e ka marrë Kosova në përcjelljen e Brukselit, dhe si i tillë është ratifikuar në Kuvendin e Kosovës”.
Analisti politik tha se BE-ja po insiston që marrëveshja për Asociacionin të zbatohet për arsye praktike, pasi Serbia tashmë po e kushtëzon edhe procesin e dialogut përmes kësaj çështjeje. Sipas Krasniqit, problemi i targave dhe mosarritja e asaj marrëveshjeje në kohë i ka dhënë hapësirë Serbisë për të kaluar në ofensivë dhe për të rritur kërkesat.
“Shtetet e Bashkimit Evropian po insistojnë në formimin e Asociacionit edhe për arsye praktike sepse Serbia tashmë kushtëzon edhe procesin e dialogut me formimin e kësaj bashkësie”.
Krasniqi vlerëson se Asociacioni duhet të formohet, por fillimisht Qeveria e Kosovës duhet ta përgatisë draftin me gjetjet e Gjykatës Kushtetuese dhe në pajtim me atë që Asociacioni nuk do të jetë “një pushtet i 3-të”, por vetëm do të akomodohen disa interesa specifike të komunitetit serb në Kosovë.
“Në anën tjeter, formimi i bashkësisë së komunave serbe do të duhej të bëhej në projektim me gjetjet e Gjykatës Kushtetuese të Kosovës, gjë që nuk e kontestojnë zyrtarët amerikanë as evropianë, prandaj qeveria do të duhej të tregohej më koordinative me Washingtonin e të mos bllokohet, siç u bllokua për çështjen e targave sepse në atë rast edhe rritet presioni, dhe si pasojë e rritjes së presionit mbi të favorizohet Serbia”.
I pyetur se çka do të ndodhë në rast se kryeministri Kurti nuk do ta pranojë kërkesen e ndërkombëtarëve, Krasniqi mendon se si në rastet e tjera edhe në rastin e Asociacionit Kurti “do të lëshojë pe”, përndryshe do të bie qeveria dhe vendi mund të futet në një krizë të thellë politike.
“Kryeministri Kurti ka thënë shumë gjëra që më vonë i ka rënë pishman. Unë po besoj që edhe këtu do të lëshojë pe, por gabimi i tij taktik dhe strategjik është që duke rezistuar po lejon që të rritet presioni mbi të dhe të shkojë faji mbi Kosovën”, u shpreh publicisti Krasniqi për InLajmin.
Sipas tij, më e “mençur” do të ishte që qeveria të kalojë në ofensivë dhe të rrisë partneritetin me aleatët ndërkombëtarët, e jo të konfrontohet me ta.
“Është në interes të qeverisë që Kurti të kalojë në ofensivë, duke e akceptuar pjesën ndërkombëtare dhe duke e hartuar vetë draftin, e jo ta lërë që këtë ta bëjë Vuçiqi dhe Serbia. Nëse Kurti nuk e pranon Asociacionin, atëherë do të rritet presioni mbi të dhe mund të bie qeveria. Kjo mund të sjellë një krizë të brendshme politike sepse do të jemi në presionin ndërkombëtar dhe në presionin e Serbisë. Kurti e ka marrë mandatin dhe duhet ta çojë deri në fund, prandaj Kurti duhet të rrittë partneritetin me aleatët ndërkombëtarë dhe jo të konfrontohet me ta”. Shqipe Vishaj /InLajmi/
