Kryeministri Albin Kurti, ka shprehur shqetësimin për vrasjet e fundit të grave në Kosovë, teksa u ka bërë thirrje qytetarëve që të heqin dorë nga paragjykimi patriarkal “nderi burrëror – gruaja shërbëtore, si dhe të ngrejnë zërin kundër burrave që ngrejnë dorë mbi gruan, përcjell InLajmi.
Shefi i ekzekutivit, tha se dhuna në familje në Kosovë është më e përhapur sesa që e paramendojmë dhe e pranojmë, pasi sipas tij secili qytetar në Kosovë e di edhe e njeh së paku një familje ku kishte apo ka dhunë.
Sipas kryeministrit për rastet e dhunës zgjimi shoqëror po ngjan vonë dhe po zgjat shkurt, kjo pasi në ditë ose 2 po mbahen protesta pastaj po harrohen këto raste, sepse siç thekson ai shoqëria jonë është përgjithësisht e heshtur për zërin e mbytur të atyre grave nga burrat vrasës.
Ai përmend faktin se Kosova i ka më pak se 10 mijë policë e më shumë se 300 mijë familje.
Postimi i plotë i tij:
Marrëveshja xhentëllmene me dhunuesit familjarë
Kosova i ka më pak se 10 mijë policë e më shumë se 300 mijë familje.
Dhuna në familje në Kosovë është më e përhapur sesa që e paramendojmë dhe pranojmë çdonjëri prej nesh. Dhunë ndaj grave dhe dhunë ndaj fëmijëve gjithandej. Me lëndime të thella shpirtërore e të dukshme fizike. Pothuajse secili qytetar në Kosovë e din dhe njeh së paku një familje ku kishte apo ka dhunë. A e ka lajmëruar atë dhe sa është interesuar për të, është një çështje tjetër pastaj. Shumësia e dhunuesve nëpër familje e ka sjellur familjarizimin me dhunuesit në shoqëri.
Kur vritet gruaja tashmë është bërë vonë. Zgjimi shoqëror edhe po ngjan vonë edhe po zgjat shkurt. Një a 2 protesta të nesërmen, dhe: mirupafshim pas vrasjes së ardhshme. Gratë që vriten në familje janë ato që kanë rezistuar ndaj dhunës së burrit. Gratë që vriten janë gra që nuk kanë heshtur. Shoqëria jonë është përgjithësisht e heshtur për zërin e mbytur të atyre grave nga burrat vrasës. Gratë dhe fëmijët e saj po luftojnë brenda shtëpive të tyre private pa mbështetjen e nevojshme publike. Beteja për barazi gjinore nuk është çështje private.
Duhet të heqim dorë nga paragjykimi patriarkal “nderi burrëror – gruaja shërbëtore”. Aktet e dhunës vijnë nga sjelljet dhunuese që vjen nga kjo mendësi e ‘padhunshme’. Qytetarët e Kosovës, e në veçanti shqiptarët të cilët e konsiderojnë veten patriotë, duhet ta ngrejnë zërin kundër burrave që ngrejnë dorë mbi gruan.
Kosova i ka më pak se 10 mijë policë e më shumë se 300 mijë familje. /InLajmi/
