Deputetja e Kuvendit të Kosovës Duda Balje, tha se qeveria e Kosovës duhet të miratojë menjëherë ndryshime në kodin penal që parashikojnë dënim të përjetshëm për ngjarje të rënda si ajo e një dite më parë, ku u vra një grua.
Në një intervistë për Euronews Albania, teksa komentoi tragjedinë e dyfishtë në Kosovë ku burri vrau gruan shtatzënë, Balja u shpreh se vetëm ky vendim radikal mund të ndihmojnë në ndërgjegjësimin e këtyre njerëzve të predispozuar për të kryer veprime të dhunshme.
“Është një mesazh për secilin burrë që mendon ose planifikon të bëjë diçka të dhunshme, edhe pse mund të duket vendim radikal, ndoshta do t’i prekë dhunuesit. Duhet dënim i përjetshëm për çdo burrë të dhunshëm. Duhet ta bëjmë këtë patjetër për të dhënë një mesazh se ne jemi serioz”, tha deputetja.
35-vjeçarja, Hamide Magashi, u qëllua për vdekje mbrëmë nga ish-bashkëshorti Sokol Halili, 31 vjeç, në oborrin e maternitetit të Prishtinës, shkruan euronews.al
Viktima ishte shtatzënë në ditën e fundit të saj të shtatzënisë, kur 31-vjeçari e vrau me një plumb në kokë dhe 2 në trup.
