Presidentja e Kosovës, Vjosa Osmani ka reaguar pas vrasjes së gruas në oborrin e QKUK-së që dyshohet që u vra nga burri, përcjell InLajmi.
Osmani ka shprehur shqetësimin e saj duke e cilësuar ngjarjen si krim makabër e çnjerëzor, ajo tha se përgjigjia e vetme për abuzuesit, dhunuesit dhe vrasësit është ligji dhe dënimi maksimal.
Ajo shtoi se një tjetër ‘’burrë’’ që nuk mund të quhet qenie njerëzore ia mori jetën gruas dhe fëmijës e duke bërë që tërë Kosova të vajtojë për gruan që s’arriti të bëhej nënë.
Borxhi i vetëm ndaj viktimave të dhunës, jetëve të palindura dhe atyre të ndërprera ësht vetëm drejtësia.
Postimi i plotë i saj:
Sonte vajton një Kosovë e tërë për gruan që s’arriti të bëhet nënë, për bijën e humbur, për jetën që u shua pa të drejtë. Sonte vajtojmë për jetën e palindur që nuk frymoi kurrë, për jetën që nuk erdhi në jetë.
Një tjetër krim makabër e çnjerëzor. Një tjetër
“burrë” që nuk mund të quhet qenie njerëzore, por që ia mori jetën gruas dhe fëmijës që do të bëhej gëzimi e jeta e nënës.
Sonte mungojnë fjalët se ato i ka zëvendësuar dëshpërimi. Sonte është e vështirë të mendosh se ka shpresë!
Por, sonte shpresa e besimi janë më të nevojshme se kurrë. Kjo valë kriminale e ky femicid ndaj grave duhet të marrë fund. Në sprovë jemi jo vetëm si shtet, por edhe si shoqëri. S’ka më arsyetime e justifikime. Jeta e vajzave dhe grave, sikurse e çdo qytetari tonë është e shenjtë.
Asnjë vajzë e grua më shumë është thirrje kombëtare për të gjithë ne. Përgjigja për dhunuesit, abuzuesit dhe vrasësit është rendi dhe ligji e dënimi maksimal.
Borxhi ynë ndaj viktimave të dhunës, jetëve të palindura e jetëve të ndërprera pa të drejtë është një dhe i vetëm: DREJTËSI!/InLajmi/
