Kryetari i Bashkimit të të Sindikatave të Pavarura të Kosovës, Atdhe Hykolli, ditën e merkurë i ka pritur në takim anëtarët e Kryesisë së Sindikatës së Pavarur të Minatorëve të Trepçës, ku temë takimi ishte gjendja e organizimit sindikal të minatorëve, e sidomos kushtet e punës dhe sigurinë në punë, përcjell InLajmi.
Kryetari i Sindikatës së Pavarur të Minatorëve të Trepçës Ibrahim Januzi, e ka njoftuar kryetarin e BSPK-së për kushtet e vështira në të cilat punojnë minatorët dhe ky i fundit premtoi se do të bëjë të pamundurën që këto shqetësime të përcillen në qeveri, e cila sipas tij duhet të marrë masa për përmirësimin e e kuhsteve të punës së minatorëve.
Njoftimi i plotë i Bashkimit të Sindikatave të Pavarura të Kosovës:
Kryetari i BSPK-së priti në takim anëtarët e Kryesisë së SPMTK-së
Komunikatë për medie e Bashkimit të Sindikatave të Pavarura të Kosovës
Sot, e mërkurë, më 30 nëntor 2022, Kryetari i Bashkimit të Sindikatave të Pavarura të Kosovës, z. Atdhe Hykolli, priti në takim anëtarët e Kryesisë së Sindikatës së Pavarur të Minatorëve të Trepçës, Kryetarin, z. Ibrahim Januzi, Nënkryetarin, z. Fevzi Ademi, dhe anëtarin e Kryesisë, z. Destan Kërleshi.
Takimi me anëtarët e Kryesisë së Sindikatës së Pavarur të Minatorëve të Trepçës kishte të bëjë kryesisht me gjendjen e organizimit sindikal të minatorëve e sidomos me kushtet e punës dhe sigurinë në punë.
Kryetari i Sindikatës së Pavarur të Minatorëve të Trepçës e njoftoi Kryetarin, z. Hykolli, për gjendjen dhe kushtet e punës në Minierën e Trepçës duke shpalosur se minatorët punojnë pa përkrahje shëndetësore dhe se pastrohen me ujë industrial duke ua vështirësuar edhe më kushtet edhe ashtu të vështira e duke ua rritur e shtuar pakënaqësinë.
Kryetari i BSPK-së, z. Atdhe Hykolli, i premtoi Kryetarit, z. Januzi, se BSPK-ja do të bëjë çmos që këto shqetësime të arsyeshme të ngritura në takimin e sotëm të përcillen më tej te Partneri Social – Qeveria e cila duhet të merr masat e duhura që të përmirësohen kushtet e punës së minatorëve – të kategorisë më të shenjtë të punëtorëve. /InLajmi/
