Iniciative për Drejtësi dhe Barazi (INJECT) dhe Iniciativa Kosovare për Stabilitet (IKS), kanë mbajtur diskutimin publik për iniciativat e reja ligjore për mbrojtjen e grave, raporton InLajmi.
Drejtoresha ekzekutive e IKS-së, Brikena Hoxha, tha se deri në tetor janë paraqitur rreth 2.040 raste të dhunës ndaj grave.
Hoxha potencoi se mosraportimi i këtyre rasteve po dergon deri në vrasjen e grave dhe shkak i kësaj janë mosndëshkimet, heshtja dhe turpi.
Tutje, ajo shtoi se 2.040 raste janë raportuar deri në tetorin e vitit 2022, por ka akoma raste që nuk janë raportuar, e kjo po ndikon në shëndetin e grave.
“Dhuna me bazë gjinore rrezikon shëndetin, integritetin, dinjitetin e viktimave të saj. Secili prej këtyre abuzimeve mund të lë plagë të thella psikologjike, të dëmtojë shëndetin e grave dhe vajzave, e në shumicën e rasteve të rezultojë edhe me vdekje” tha drejtoresha e IKS-së.
Kryetarja e Komisionit për të Drejtat e Njeriut, Barazi Gjinore, Persona të Pagjetur, Viktimat e Dhunës Seksuale të Luftës dhe Peticione, Duda Balje, foli për Projektligjin për parandalimin dhe mbrojtjen nga dhuna në familje, dhuna ndaj grave dhe nga dhuna në baza gjinore.
Ajo tha se i njëjti është në Kryesi të Kuvendit dhe se për këtë nuk ka kundërshtime ndërmjet pozitës dhe opozitës.
“Kemi marrë komente nga ana e Qeverisë. Për Ligjin kemi bashkëpunuar me OJQ dhe jemi të kënaqur me komentet e sjella. Mund të them se e kemi bërë një ligj shumë të mirë dhe është më radikal sesa ai që është aktiv”, potencoi Balje.
Ndërsa shefi i seksionit për Ligj dhe Drejtësi nga misioni i OSBE-së, Mark Lasser, tha se dhuna ndaj grave është fenomen në gjithë botën.
“Problemi i dhunës në familje ka qenë për një kohë të gjatë. Gjatë punë në OSBE, kam monitoruar rastet e dhunës në familje dhe ka qenë një problem mjaft i madh. Ndonëse ka qenë problem edhe në të kaluarën, kjo do të thotë se ne duhet të luftojmë. Dua të theksoj se jo vetëm në Kosovë po çdo kund në botë ekziston dhuna ndaj gruas”, tha ai.
Deputetja e Kuvendit të Kosovës tha angazhimi i ekspertëve për këtë çështje është bërë me kujdes të shtuar, duke e analizuar secilin nen dhe ka shpresë se ky projektligj do të kalojë. /InLajmi/
