Ministrja e Drejtësisë, Albulena Haxhiu, ka reaguar pas vrasjes së gruas nga burri në QKUK, përcjell InLajmi.
Haxhiu tha se brenda 5 ditësh 2 gra të vrara nga bashkëshortët janë krime të rënda, gruaja që po priste fëmijën të sillte në këtë botë vritet nga burri i saj, ajo u shua bashkë me fëmijën e saj dhe këto raste na bëjnë të kuptojmë që pavarësisht veprimeve që kemi ndërmarrë kemi edhe shumë punë për të bërë, u shpreh ministrja.
Ajo ka shprehur ngushëllime familjarëve dhe ka thirrur grupin e ngushtë ndërministror ditën e enjte në ora 8:30, me qëllim të raportimit për së afërmi me secilin veprim institucional.
Postimi i plotë i saj:
Një grua dhe foshnja që priste ta sillte në jetë u vranë tek shkallët e repartit të gjinekologjisë. Krim i rëndë, vrasje e dyfishtë!
Brenda 5 ditëve 2 gra të vrara nga bashkëshortët.
Gruaja që priste fëmijën të sillte në këtë botë, vritet nga burri i saj, në vendin ku lindin fëmijët e vendit tonë, ku gratë bëhen nëna, nga atje ku lindë një jetë e re. Me shpresën për një botë më të mirë.
Një grua që duhej të mbrohej. Ajo u shua. U shua bashkë me fëmijun ende të pa lindur.
Këto krime të rënda na bëjnë të kuptojmë që femicidi është i përhapur në shoqërinë tonë.
Rastet si ky na bëjnë të kuptojmë që pavarësisht veprimeve që kemi ndërmarrë, kemi edhe shumë punë për të bërë.
Lufta me femicidin mund të jetë e vështirë por nuk guxojmë të humbim shpresat por të bashkohemi si institucione dhe si shoqëri për luftimin e femicidit që po merr jetët e grave.
Nesër në orën 08 e 30, mblidhet grupi i ngushtë ndërministror me qëllim të raportimit për së afërmi me secilin veprim institucional.
Familjarëve të viktimave, u shprehim ngushëllimet më të sinqerta!
Dhunuesit dënimin më meritor!/InLajmi/
