Në Kuvendin e Kosovës po zhvillohet seanca plenare ndërsa në rend dite është interpelanca “Masat urgjente të Qeverisë së Republikës së Kosovës në raport me situatën e krijuar në vend”, ndërsa kësaj thirrje i është përgjigjur kryeministri i cili para deputetëve shpalosi detaje lidhur me situatën në veri tash e disa javë, raporton InLajmi.
Derisa paraqiti disa të dhëna për situatën e krijuar, kryeministri Albin Kurti, tha se qeverisja e tij nuk varet nga Lista Serbe,
Sipas tij nëse do të ishte e varur nga ky subjekt, deri më tani do bëhej një mocion mosbesimi.
Kryeministri Kurti foli edhe për dorëheqjet e zyrtarëve serbë të policisë. Ai tha se nuk ka qenë vendim i tij, derisa tregoi se cila ka qenë arsyeja e dorëheqjeve.
“Çështja e trajtimit të dorëheqjeve të zyrtarëve policorë nuk është vendim i imi, as i MPB-së, nuk është vendim politik. Vendim politik ka qenë dorëheqja politike. Për bindjen time, për arsye të paqena, thoshin morale dhe individuale e teksti krejt i njëjtë për secilin prej tyre. E njëjta krizë morale e individuale i kishte kapur kolektivisht bashkë secilin prej tyre me tekstin identik te dorëheqjes, ky është vendim politik. E përsëris thirrjen që asnjë serb të mos i braktisë institucionet. E tillë do të jetë edhe në ditët në vijim. Institucionet nuk janë të Qeverisë dhe të një komuniteti, janë të të gjithë qytetarëve të Republikës”, deklaroi kryeministri para ligjvënësve.
Kurti theksoi se të gjithë duhet të gëzohen se Kosova tani ka një qeveri e cila nuk varet nga Lista Serbe.
“Sikur të ishim në qeveritë e kaluara, ku shumica bëhej e varej nga Lista Serbe, me siguri që do kishte edhe mocion mosbesimi për ta rrëzuar qeverinë, por, ja që kjo nuk është e mundur tash. Reciprociteti me targa, reciprociteti me letërnjoftime, do të ishte motiv i mjaftueshëm për ta, që ta rrëzojnë qeverinë. Mirëpo ka ndodhur ndryshimi i madh, dhe besoj se të gjithë duhet të gëzohemi për faktin se Republika e Kosovës ka një qeveri e cila nuk varet për mazhorancën nga votat e Listës Serbe”, tha kryeministri Kurti./InLajmi/
