Zëvendëskryeministri i Kosovës, Besnik Bislimi, ditën e merkurë tha se është hedhur një hap i madh drejt liberalizmit të vizave për qytetarët e Kosovës, përcjell InLajmi.
Bislimi shtoi se dakordimi mes ambasadorëve për ta dërguar këtë proces deri në vendimin final është i mirëpritur.
Zëvendëskryeministri theksoi se deri në arritjen e kësaj faze ka qenë një proces i gjatë, por gjatë takimeve është gjetur edhe burimi i problemit, që e pa prolonguar liberalizmin e vizave për Kosovën.
Tutje, ai e falenderoi Presidencës e Çekisë të Këshillit të BE-së për përkushtimin në shtyrjen përpara të procesit të liberalizimit të vizave, si dhe të gjitha shtetet anëtare që e kanë mbështetur aktivisht Republikën e Kosovës në këtë proces.
Postimi i plotë i tij:
Një hap i rëndësishëm është hedhur sot drejt liberalizimit të vizave për qytetarët e Republikës së Kosovës. Mirëpresim dakordimin mes ambasadorëve të vendeve anëtare të Bashkimit Evropian, për ta kaluar procesin drejt fazave të radhës, deri në vendimin final.
Ka qenë një proces i gjatë i takimeve konsultative me vendet skeptike, ku kemi marrë burimin e problemit. E kemi trajtuar atë dhe theksuar se vendi ynë gjatë vitit të fundit ka shënuar progres madhor në fushën e sundimit të ligjit, luftën kundër korrupsionit, forcimin e kontrolleve kufitare dhe menaxhimin e migrimit. Puna, përkushtimi dhe angazhimi në këtë proces, u riafirmua sot dhe nga të gjitha shtetet anëtare të BE-së.
Pas shumë viteve ngecje e pritjeve të tejzgjatura, çështja e liberalizimit të vizave ecën tutje në procedurat e vendimmarrjes në institucionet e BE-së, ku faza e rradhës është ajo ndër-institucionale mes Këshillit të BE-së dhe Parlamentit Evropian, nga ku presim që procedurat të kalohen shpejt dhe të kthehen në Këshillin e Ministrave për vendimin final.
Falenderues ndaj Presidencës së Çekisë të Këshillit të BE-së, për vëmendjen e tyre të veçantë dhe përkushtimin në shtyrjen përpara të procesit të liberalizimit të vizave, si dhe të gjitha shteteve anëtare që e kanë mbështetur aktivisht Republikën e Kosovës në këtë proces. /InLajmi/
