Zëvendëskryeministri i Kosovës për Integrim Evropian, Zhvillim dhe Dialog, Besnik Bislimi, tha se Kosova e ka datën për aplikim në BE për marrjen e statusit të vendit kandidat dhe se është në diskutim të ngushtë me presidencën çeke për një gjë të tillë.
Megjithatë, sipas Bislimit, një datë e tillë nuk do të bëhet publike derisa të konfirmohet nga presidenca e BE-së, megjithëse tha se do të jetë në muajin dhjetor.
“Kemi përgatitë një dokument të pozicionit tonë politik të cilin ia kemi ndarë të gjitha vendeve anëtare dhe jemi në koordinim me presidencën çeke për ta caktuar datën. Ne e kemi një datë por derisa nuk është e konfirmuar nuk e bëjmë publike por është muajin dhjetor”, tha Bislimi.
Ai këto deklarime i bëri gjatë raportimit para Komisionit parlamentar për Integrim.
Bislimi duke iu përgjigjur deputetëve pjesëmarrës në këtë komision, tha se këtë vit do të dorëzohet aplikimin për statusin e kandidatit, derisa shtoi se është gabim të thuhet a është momenti i duhur apo jo, raporton teve1.info.
“Sepse nëse vlerësohet momenti kurrë nuk merr përgjigjen e duhur nga BE-ja nëse është momenti i duhur ose jo për aplikim”, shtoi ai.
