Deputeti i VV-së, Mefail Bajqinovci ka reaguar pas deklaratës së nënkryetarës të PDK-së, Vlora Çitaku, e cila iu kundërpërgjigj kryeministrit Kurti për liberalizimin e vizave duke thënë se ajo ka filluar dhe përfunduar me gazin lotsjellës në kuvend, përcjell InLajmi.
Bajqinovci tha se liberalizimi i vizave që urohej çdo vit më në fund po shkon drejt një përfundimi pozitiv, ku ky hap sipas tij është i lidhur me luftën ndaj korrupsionit dhe krimit të organizuar.
Në fund, Mefail Bajqinovci kërkoi nga Vlora Çitaku që të mos hapen shampanjat sepse liberalizimi kryhet edhe pa to.
Postimi i plotë i tij:
Broçkullat janë të këtyre që i hapnin shampanjat
Liberalizimi i vizave që urohej çdo vit e disa herë brenda vitit (madje për disa tjerë ishte kryer “pardje”) më në fund po shkon drejt një epilogu pozitiv.
Ky proces shënon një arritje të rëndësishme për vendin tonë e për qytetarët tanë, që padrejtësisht janë privuar nga një prej parimeve themelore të Bashkësisë Europiane që është lëvizja e lirë.
Mbi të gjitha, ky hap i rëndësishëm është i lidhur me luftën e pakompromis ndaj korrupsionit dhe krimit të organizuar, që përmendej si vërejtje serioze në çdo vit nga faktorët ndërkombëtarë.
Vlorë, mos hapni shampanja sepse liberalizimi kryhet edhe pa to!/InLajmi/
