Ambasadori i Gjermanisë në Kosovë, Jorn Rohde ka mirëpritur vendimin e ambasadorëve të vendeve anëtare të BE-së, për t’i hapur rrugë liberalizimit të vizave për Kosovën.
Rohde në një postim në rrjete sociale, ka shkruar se një vendim i vonuar për të cilin Gjermania ka punuar shumë.
“Më në fund, një vendim i vonuar për të cilin Gjermania ka punuar shumë!”, ka shkruar Rohde.
Ambasadorët e vendeve anëtare të BE-së, u pajtuan këtë të mërkurë për t’i dhënë mandatin Këshillit Evropian që të negociojë procesin e heqjes së vizave për Kosovën me Parlamentin Evropian.
Sipas vendimit, lëvizja pa viza për qytetarët e Kosovës do të jetë e mundur kur të hyjë në fuqi sistemi evropian i udhëtimit, ETIAS, dhe data për këtë është 1 nëntori i vitit 2023, transmeton FrontOnline.
Por, në rast se do të ketë vonesa për këtë sistem, liberalizimi i vizave për Kosovën do të hyjë në fuqi jo më vonë se më 1 janar të vitit 2024.
