Për nder të ditës së Flamurit dhe me rastin e shënimin të 50-të vjetorit të manifestimit tradicional letrar, “Muzgjet e Prizrenit”, në organizim nga SHB “Fidani” dhe DKRS në ambientet e bibliotekës së qytetit në Prizren, para një numri të madh të aderuesve të librit, u bë përurimi librit të 11-të me radhë, “Shtegu i vargut tim”, të autorit prizrenas Salajdin Krasniqi, shkruan InLajmi.
Të pranishmit i përshëndeti Adem Morina drejtori i DKRS-së, i cili në emër të tij dhe të kryetarit të Komunës së Prizrenit, Shaqir Totaj, ua uroi festën e 28 Nëntorit, si dhe e përgëzoi autorin Krasniqi për botimin e librit të tij të njëmbëdhjetin me radhë.
Për librin “Shtegu i vargut tim”, folën edhe 2 recensentët e librit, Skender Zogaj dhe prof. dr. Nexhat Çoçaj, të cilët theksuan se profili poetik i Krasniqit, është specifik, ngase imazhi i individualitetit të tji shpirtëror, ngarthen me qytetin e lindjes, veçmas me gurin autokton të nënqiellit të qytetit të lashtë Prizrenit, si symbol i kalldërmave, i urës së gurit, kalasë së vjetër, e deri tek rrapi pesqindvjeçar. Këto janë edhe pjesë të pandashme të lajtmotivit që dominojnë në gjithë krijimtarinë letrare të poetit Salajdin Krasniqi.
Në librin e fundit “Shtegu i vargut tim”, që doli nga shtypi nga Shtëpia Botuese “Fidani” në Prizren, janë gjithsej 100 poezi, të ndara në tre cikle; : “Duaje të sotmen”, “Qerpiku i thinjur” dhe cikli i tretë “Përsëri për gurin”, ku dominon motivi i dashurisë e që nuk trajtohet vetëm dashuria mes një çifti, por edhe dashuria për njeriun dhe jetën, mes kalldërmave, buzë Lumbardhit, e në veçanti për rrugicat e qytetit të lashtë, që gjithëherë frymojnë me poetin.
Autorin Salajdin Krasniqi, e përgëzoi edhe redaktori i librit Berat Batiu, i cili tha është njëri prej lexuesve të parë e të rregullt, dhe se ka respekt dhe konsideratë të jashtëzakonshme për penën dhe vetë autorin Krasniqi. Osman Goranci / InLajmi/
