Më shumë se 100 gra janë vrarë në Itali deri më tani këtë vit, ku pothuajse gjysma e tyre janë vrarë nga partneri i tyre intim ose ish-partneri, tha policia italiane, transmeton InLajmi.
I publikuar të premten për të shënuar Ditën Ndërkombëtare për Eliminimin e Dhunës ndaj Grave, raporti rendit emrat dhe detajet e vdekjes së 95 grave të vrarë nga fillimi i vitit deri më 7 nëntor.
Ato përfshijnë 27 vjeçaren Carol, e cila u vra nga ish i dashuri i saj, i cili e goditi me një çekiç dhe më pas e hodhi trupin e saj të copëtuar nga një shkëmb, 40 vjeçarja Elisabetta e cila vdiq pasi u godit 10 herë nga burri i saj dhe 74 vjeçarja Silvana, burri i së cilës e rrahu për vdekje me shkop.
Kryeministrja italiane Giorgia Meloni tha të premten se qeveria e saj ishte e përkushtuar për të luftuar dhunën me bazë gjinore dhe “murtajën e tmerrshme të femicideve”.
“Ne ia kemi borxh këtë shumë viktimave”, tha ajo në një deklaratë.
Në Itali, 31.5% e grave kanë pësuar një formë të dhunës fizike ose seksuale dhe 5.4% kanë qenë viktima të formave të rënda të dhunës seksuale si përdhunimi, sipas Institutit Italian të Statistikave (ISTAT).
Statistikat italiane vijnë pasi bota dëshmoi një krizë abuzimi në familje gjatë pandemisë së koronavirusit. Humbjet e vendeve të punës, mosveprimi i qeverisë, punët e pazgjidhura gjyqësore dhe shumë faktorë të tjerë kontribuan në atë që Kombet e Bashkuara e kanë quajtur “pandemi në hije të dhunës ndaj grave dhe vajzave”.
Sipas një raporti të OKB-së, 45,000 gra në mbarë botën u vranë nga partnerët e tyre ose anëtarë të tjerë të familjes vitin e kaluar. Kjo do të thotë se më shumë se 5 gra ose vajza vriteshin çdo orë nga dikush në familjen e tyre, shkruan CNN.
Në të gjithë Evropën, rastet e dhunës ndaj grave kanë shkaktuar zemërim vitet e fundit. /InLajmi/
