Komisioni Qendror i Zgjedhjeve, KQZ, të hënën certifikoi subjektet politike dhe kandidatët e tyre për kryetar për zgjedhjet e 18 dhjetorit që do të mbahen në komunat serbe.
2 partitë e mëdha Lëvizja Vetëvendosje dhe Partia Demokratike e Kosovës, do të garojnë me nga 4 kandidatë, kurse pjesë e procesit zgjedhor do të jenë edhe subjektet tjera politike.
Në Mitrovicë të Veriut, Vetëvendosje ka kandidatë për kryetar Erden Atiq, kurse PDK-ja, Taulant Kelmendin.
Por, cilat janë pritshmëritë e kandidatëve të partive shqiptare për zgjedhjet e 18 dhjetorit në Mitrovicë të Veriut.
Kandidati i VV-së, Erden Atiq ka thënë se shpreson se do të jetë fitues i zgjedhjeve të 18 dhjetorit në Mitrovicë të Veriut.
Këtë e thotë për shkak se në 2 palë zgjedhjet e kaluara ka qenë më i votuari pas Listës Serbe.
Kurse sa i përket koalicioneve thotë se ende është herët të flitet.
“Po padyshim, duke e marrë parasysh që në 2 palë zgjedhjet paraprake, kam qenë kandidati më i votuar pas Listës Serbe. Për aspektin e koalicionit kemi bashkëpunim me partitë të tjera dhe me etnitete tjera politike që nuk kanë marrë pjesë në zgjedhje, por a ka me pas diçka kështu formalisht nuk mundem me dit prej tash”, është shprehur Atiq për Front Online.
I, pyetur se në rast të fitores a do të pranohet nga qytetarët serb, Atiq thotë se rezultati zyrtar duhet të pranohet.
“Po, pa marrë parasysh rrethanat, siç e dini edhe KQZ-ja e ka dhënë verdiktin e vet se pa marrë parasysh përqindjen e daljes në ditën e zgjedhjeve me 18 dhjetor rezultati ka me qenë zyrtar dhe i pranueshëm dhe mendoj që ka me u pranu edhe më lehtë prej komunitetit serb, prej asaj pjesë që nuk janë nën agjendën, kërcënimet, presionin e shantazhin që ua bën Lista Serbe”, ka shtuar ai.
Ai, ka folur edhe për mundësinë e tërheqjes së kandidatëve serb nga këto zgjedhje, duke thënë se nuk kanë arsye, pasi që Lista Serbe tashmë ka humbur ndikimin tek qytetari i rëndomtë serb.
“Unë mendoj që nuk kanë me u tërhjek. Nuk mendoj që ka arsye objektive për më u tërheq prej kandidaturës. Shpresa është që Lista Serbe ka me hup ndikimin në relacionin e shantazhit që e ka me qytetarin e rëndomtë serb, kështu që nuk mendoj që kanë arsye kandidatët e pavarur ose pjesë e iniciativave nuk mendoj që kanë arsye me u tërhjek dhe i inkurajoj që mos me u tërhjek”, është shprehur ndër të tjera Atiq.
