Ish-presidentja e Kosovës, Atifete Jahjaga, ka shprehur habi me praninë e Ministrit të Punëve të Jashtme të Serbisë në Konferencën Ndërkombëtare për Parandalimin e Dhunës Seksuale në Konflikt, të mbajtur ditën e hënë, përcjell InLajmi.
Jahjaga tha se Daçiq ishte pjesë e regjimit politik të Serbisë në luftën kundër Kosovës, ku u dhunuan me mijëra femra kosovare dhe nuk e kupton a ishte aty në cilësinë e ekspertit apo kishte ardhur për të kërkuar falje për krimet e realizuara në Kosovë.
Tutje, ajo shtoi se Mbretëria e Bashkuar është lider global në përpjekjet për ta parandaluar dhunën seksuale në konflikt, prandaj edhe ftesa për Daçiqin është në kundërshtim me punën e Mbretësirë së Bashkuar për të ndihmuar viktimat e dhunës.
Postimi i plotë i saj:
E habitur që Konferenca Ndërkombëtare për Parandalimin e Dhunës Seksuale në Konflikt (Preventing Sexual Violence in Conflict) i ka bërë ftesë dhe i ka dhënë platformë Ivica Daçiqit, zëdhënësit dhe bashkëpunëtorit të Slobodan Millosheviqit, përderisa viktimat e politikave të tij ishin të ulura në audiencë.
A ishte ai atje për të pranuar krimet që Serbia i ka kryer në Ballkan dhe për të kërkuar falje për to, apo ishte prezent në cilësinë e ekspertit? Ivica Daçiq ishte pjesë e një regjimi politikë e të cilit ishte përdhunimi i grave kosovare.
Kjo ftesë është në kundërshtim me punën e zellshme përgjatë një dekade që Qeveria e Mbretërisë së Bashkuar e ka bërë për të ndihmuar viktimat e dhunës seksuale gjatë luftës që të tejkalojnë traumat e tyre dhe t’i japin fund këtij krimi të tmerrshëm.
Gjatë vizitës së tij në Kosovë në vitin 2016, Lartmadhëria e Tij Mbreti Charles III, takoi të mbijetuarit e dhunës seksuale gjatë luftës. Mbretëria e Bashkuar është lider global në përpjekjet për ta parandaluar #DhunënSeksualenëKonflikt, dhe Kosova ka gjetur një shtet mik krahas të cilit kërkon drejtësi për të mbijetuarit.
Viktimat e dhunës seksuale në konflikt shpresojnë që një ditë do të ballafaqohen me dhunuesit e tyre para një gjykatësi për të vënë drejtësi e jo në konferenca për të diskutuar parandalimin e përdhunimit në konflikt. InLajmi/
