Komisioni Ad-Hoc për Reformën Zgjedhore në Kosovë në punëtorinë e fundit janë prezantuar diskutimet e rekomandimeve të KQZ-së në Komisionin Ad-Hoc të Kuvendit, raporton InLajmi.
Në këtë takim të gjithë pjesëmarrësit janë pajtuar që draftin e fundit të Reformës Zgjedhore ta dërgojnë shumë shpejt në Kuvend.
Se ka dakordim brenda subjekteve politike për draftin final e tha edhe Kryetari i Komisionit Ad-Hoc për Reformën Zgjedhore në Kosovë, Abelard Tahiri, i cili konfirmon se ekziston konsensusi brenda partive që së shpejti draftin ta dërgojnë për në Kuvend.
“Kemi një lloj konsensusi brenda këtij Komisioni Ad-Hoc për trajtimin e çështjeve të rëndësishme e të cilat do ta bëjnë edhe më efikas këtë proces. Ne e kemi përmbyll me një afat të caktuar dhe besoj që kjo do të jetë punëtoria e fundit para se të fillojmë me draftimin e Ligjit për zgjedhjet nacionale”, tha Tahiri.
Ndërkohë , nënkryetari i këtij Komisioni, Adnan Rrustemi, tha se do të marrin për bazë rekomandimet e OSBE-së sikur edhe gjetjet e misionit të BE-së për ta përmbyllur me sukses këtë proces.
“Komisioni Ad-Hoc i themeluar nga Kuvendi i Kosovës si rrjedhojë e deklaratave të nënshtruara nga përfaqësuesit e partive politike, ka një mandat dhe që buron nga kjo deklaratë dhe ka për qëllim përmirësimin dhe forcimin e procesit zgjedhor duke marrë shkas nga rekomandimet e Misionit të Vëzhguesve të BE-së pa u kufizuar në këto rekomandime, por që gjithsesi në funksion të procesit të organizimit të zgjedhjeve”, theksoi Rrustemi.
Shefi i Misionit të OSBE-së në Kosovë, Michael Davenport, tha janë të gatshëm ta ndihmojnë Komisionin për këtë çështje, duke përgëzuar Komisionin për punën e bërë.
“Besoj që Ligji për zgjedhjet e përgjithshme në Kosovë ofron një bazë të mirë për mbajtjen e zgjedhjeve demokratike megjithatë diçka siç është diskutuar dhe siç është rekomanduar nga shumë palë ka nevojë por edhe një mundësi për të forcuar ketë kornizë ligjore dhe për të ofruar edhe më shume në standardet ndërkombëtare për zgjedhje”, u shpreh Davenport.
Ndryshe Komisioni Ad-Hoc për Reformën Zgjedhore në Kosovë, mbajti punëtorinë e fundit në të cilën kanë marr pjesë zyrtarë nga KQZ, OSBE, përfaqësues nga ambasadat e huaja etj/InLajmi/
