Në emër të Shteteve të Bashkuara të Amerikës, sekretari i Shtetit Antony Blinken ka uruar popullin shqiptar me rastin e 110-vjetorit të Pavarësisë së Shqipërisë, përcjell InLajmi.
Në mesazhin e urimit, Blinken ndër të tjera tha se është i nderuar të urojë popullin e Shqipërisë për 110-vjetorin e Pavarësisë, ndërsa thekson se SHBA është krenare që qëndron krah me shqiptarët dhe gjithashtu krenare që festojnë 100-vjetorin e marrëdhënieve diplomatike SHBA-Shqipëri.
Blinken uron Shqipërinë për arritjet e saj edhe në hapjen e negociatave me BE në korrik, ndërsa thekson se SHBA, mbetet e përkushtuar në mbështetje të rrugëtimit transatlanitike të Shqipërisë.
Urimi i plotë i Ambasadës së SHBA-së në Tiranë
“Në emër të Shteteve të Bashkuara të Amerikës, është nderi im të uroj popullin e Shqipërisë në 110-vjetorin e Pavarësisë. Shtetet e Bashkuara janë gjithashtu krenare të festojnë 100-vjetorin e marrëdhënieve diplomatike SHBA-Shqipëri dhe partneritetin e gjerë e të fortë që kemi ndërtuar së bashku.
Shtetet e Bashkuara kanë qenë të nderuara të punojnë së bashku me Shqipërinë në Këshillin e Sigurimit të Kombeve të Bashkuara, teksa ju vazhdoni të jepni kontribut të rëndësishëm në skenën botërore. Shqipëria ka shfaqur lidership dhe guxim duke mbështetur Ukrainën dhe duke vënë në dukje veprimet e aktorëve keqdashës në Evropë dhe në mbarë botën. Kontributet e çmuara të Shqipërisë si aleate e NATO-s ndihmojnë në mbajtjen e Aleancës të fortë, të përgatitur dhe të vendosur. Shtetet e Bashkuara falënderojnë gjithashtu Shqipërinë për partneritetin dhe mbështetjen e saj gjatë zhvendosjes së afganëve.
Ne urojmë Shqipërinë për arritjen e hapjes të negociatave me BE në korrik dhe mbetemi të përkushtuar për t’ju mbështetur përgjatë rrugës suaj transatlantike. Së bashku, po punojmë për të luftuar korrupsionin dhe krimin e organizuar, për të siguruar energji ndërsa çojmë përpara agjendën tonë të përbashkët klimatike për Evropën dhe për të forcuar mbrojtjen kibernetike.
Teksa hyjmë në shekullin tjetër të marrëdhënieve tona, ne jemi krenarë të qëndrojmë krah për krah me popullin shqiptar.” – Sekretari i Shtetit i SHBA, Antony J. Blinken./InLajmi/
