Me kërkesë të Ministrisë së Kulturës, Qeveria e udhëhequr nga ish-kryeministri Avdullah Hoti kishte shpallur muajin nëntor si “Muaji i Anton Çettës”, duke miratuar edhe programin e aktiviteteve përkujtimore, raporton InLajmi.
Ndonëse për vendin ku do të vendosej kjo shtatore kishte dhënë propozim edhe Kuvendi Komunal i Prishtinës, ku kishte miratuar propozimin për vendosjen e shtatores së veprimtarit të çështjes kombëtare në parkun para Fakultetit të Filologjisë në Prishtinë. Ministrja e atëhershme e Kulturës, Vlora Dumoshi, kishte thënë se me këtë shtatore do jepnin kontributin për historinë e re të Kosovës.
Një propozim tjetër kishte ardhur nga Ipeshkvia e Kosovës, në janarin e vitit të kaluar, që kishte marrë vendim që ta vendoste një tjetër shtatore të Çettës para hyrjes së katedrales “Shën Tereza” në Prishtinë.
Por të 2ja këto propozime ishin kundërshtuar nga familja e Profesor Anton Çettës, të cilët kishin cilësuar se shtatorja e tij do të duhej të vendosej në një hapësirë më të madhe publike, sepse veprimtaria e tij ka qenë e pakrahasueshme dhe nuk i përket botës fetare e as asaj partiake.
Në ditën e flamurit, me 28 nëntor, u përurua kjo shtatore, e cila ka plot 4 vite që është duke qendruar në atelien e skulptorit Agon Qosa.
Të pranishëm në këtë ceremoni ishin edhe kryetari i Prishtinës, Përparim Rama, dhe profesorë të shumtë.
Ndër të tjera Rama tha se Anton Çetta ishte njeri i veçantë dhe se puna e tij për pajtimin e gjaqeve ishte e pakrahasueshme.
“Profesor Anton Çetta vërtet i veçantë ishte, të gjithë ja njohim punën e palodhshme dhe të jashtëzakonshme që e kreu në punën e pa lodhshme me punën e prozës popullore. Profesor Çetta themeloi dhe udhëhoqi komunitetin e pajtimit të gjaqeve dhe e çrrënjosi traditën shekullore të vëlla vrasjes duke pajtuar rreth 1.800 gjaqe rreth 30.000 ngatërrime” tha Rama.
Tutje, Rama shtoi se populli i Kosovës është me fat që kishte një njeri të tillë.
“Jemi njerëz me shumë fat, që Kosova jonë lindi një njeri kaq të madh. Kjo shtatore që po përurojmë është vepër e skulptorit Agon Qosa”, përfundoi kryetari i kryeqytetit të Kosovës.
Profesori Jahja Dranqolli, tha se kjo shtatore u ngrit në bindje të fortë njerëzore që vepra e profesor Çettës bartë vlera që nderojnë çdo shqiptarë kudo që është.
“Kjo shtatore nuk është ngritur me kriteret partiak apo politike, por ka një bazë të gjerë intelektuale të bazuar në bindje të fortë njerëzore që vepra e profesor Çettës bartë vlera që nderojnë çdo shqiptarë kudo që është. Profesor Çetta nxori disa breza studiuesish dhe profesorësh të Gjuhës dhe Letërsisë Shqipe. Në vitin 1990 në tubimin të Verrat e Llukës për herë të parë në historinë e shqiptarëve u mblodhën në një vend mbi 500.000 njerëz, kjo ngjarje mund të inkuadrohet në radhën e kuvendeve të historisë tonë siç ishte ai Kuvendi i Lezhës dhe ai i Prizrenit”, tha ai.
Profesori Riza Krasniqi, tha se virtyti kryesor i profesorit Anton Çetta ishte ndershmëria.
“Gjaqet u falën për çështjen kombëtare, sepse pas çdo falje e pajtimi ne ishim të fortë dhe liria ishte një hap më afër. Kur flasim për profesorin virtyti i tij i parë ishte ndershmëria e tij. Edhe e udhëhoqi lëvizjen ndershëm. Dihet se kur lideri është i ndershëm edhe populli është i ndershëm”, potencoi profesori Krasniqi.
Kjo shtatore është financuar nga Agjencia për Menaxhimin e Komplekseve Memoriale, dhe ka kushtuar 60.800 euro. /InLajmi/