Presidenti i Shqipërisë, Bajram Begaj, ditën e hënë ka uruar të gjithë shqiptarët për festën e flamurit, përcjell InLajmi.
Begaj së bashku me krerët shtetëror nga Kosova dhe Shqipëria bënë homazhe në Vlorë tek shtatorja e përbashkët e heronjëve të shqiptarëve, disa prej të cilëve ngritën flamurin e disa të tjerë dhanë jetën për liri.
Presidenti i Republikës së Shqipërisë tha se lufta e shqiptarëve është luftë e paepur për liri, dije dhe progres e mbi të gjitha është luftë e një populli që dashurinë për atdheun e ka zot e fe.
Ai shtoi se kombi shqiptar ka nevojë për përkushtimin e secilit, sepse është amanet i të parëve tanë dhe përgjegjësi e jona.
Postimi i plotë i tij:
Nga Vlora e bukur e Shqipërisë, uroj sot të gjithë shqiptarët në Shqipëri, Kosovë, Maqedoninë e Veriut, Malin e Zi, Luginën e Preshevës, arbëreshët dhe kudo ku ndodhen shqiptarë në botë:
Gëzuar Ditën e Flamurit!
Gëzuar 110 Vjetorin e Pavarësisë së Shqipërisë!
Në këtë qytet u valëvit më 28 nëntor të vitit 1912 për herë të parë Flamuri shqiptar. Këtu kumboi Himni i Pavarësimit të Shtetit të ri Shqiptar, të një populli që hynte në epokën e mëvetësisë dhe sovranitetit, si kurorëzim i përpjekjeve, aspiratave dhe sakrificave të panumërta shekullore.
Historia jonë kombëtare është histori luftërash e sakrificash të paepura për liri, është histori përpjekjesh të pafundme për dije e progres, është histori e një populli që dashurinë për atdheun e ka mbi gjithçka.
Askund më mirë se në Vlorën e Flamurit, e në këtë ditë, nuk mund të marrë vlerë mesazhi për përgjegjësinë e të gjithëve dhe më së pari të klasës politike dhe institucioneve.
Dua të sjell në vëmendje sot se atdheu dhe kombi kanë nevojë për përkushtimin, përgjegjësinë, shërbimin dhe dashurinë e secilit prej nesh.
Sepse ky flamur dhe kjo tokë është amaneti i të parëve, është përkatësia dhe përgjegjësia e të gjithëve ne! /InLajmi/
