Kryetari i Lidhjes Demokratike të Kosovës, Lumir Abdixhiku, uron gjithë shqiptarëve festën e 28 Nëntorit, derisa thekson se në këtë përvjetor të shtetësisë 110 vjeçare të Shqipërisë festojmë ditën historike të mbarë shqiptarisë, përcjell InLajmi.
Lideri i LDK-së tha se sot kujtojmë plakun urtak Ismail Qemalin që së bashku me burra të tjerë e shpalli Shqipërinë shtet të pavarur.
Abdixhiku kujtoj disa ngjarje historike shkurtazi ndërsa nuk harron të kujtojë në këtë ditë historike edhe Presidentin e parë të Kosovës, atë që vuri themelet e shtetit të Kosovës, dr. Ibrahim Rugovën.
Ai kujtoi edhe sakrificën e komandantit legjendar Adem Jashari dhe heronjve të tjerë që luftuan e u flijuan për lirin e Kosovës.
I pari i LDK-së tha se populli shqiptar ka një histori të gjatë e të lavdishme, prandaj me të drejtë konstatohet se kombi shqiptar është faktor i paqes dhe stabilitetit në rajon.
Postimi i plotë i tij në faqen zyrtare të Lidhjes Demokratik etë Kosovës:
Urimi i kryetarit të LDK-së, Lumir Abdixhiku me rastin e Festës së 28 Nëntorit!
“Urime për 28 Nëntorin – Ditën e Flamurit shqiptar!
Sot shënojmë ditën e shqiptarëve – 110 vjetorin e shpalljes së pavarësisë së Shqipërisë. Kjo është dita historike e të gjithë shqiptarëve kudo që ndodhen. Është Nëntori i 2-të, dita më e rëndësishme pas 28 Nëntorit të Gjergj Kastriotit Skënderbeut . Për këtë ditë u bashkuan të gjithë burrat e kombit të Lidhjes Shqiptare të Prizrenit.
Sot, në këtë përvjetor kujtojmë plakun e urtë, Ismail Qemali, i cili i rrethuar nga burrat e tjerë të kombit e shpalli Shqipërinë shtet të pavarur. E kujtojmë Presidentin historik, Ibrahim Rugova, që me idenë dhe bërjen e shtetit të Kosovës, e plotëson këtë ditë të madhe. E kujtojmë komandantin legjendar, Adem Jashari, sakrifica e të cilit është shembull për mbrojtjen e pragut të shtëpisë. I kujtojmë e nderojmë dëshmorët, heronjtë dhe luftëtarët e Ushtrisë Çlirimtare të Kosovës.
Me të drejtë, sot konstatohet se kombi shqiptar është faktor i paqes dhe stabilitetit në rajon. Prandaj ne na mbetet që të punojmë të gjithë bashkë për integrimin e 2 shteteve në familjen tonë natyrale – perëndimore.
Zoti i bekoftë shqiptarët!
Zoti i bekoftë miqtë e shqiptarëve!
Zoti e bekoftë Kosovën!/InLajmi/
