Gjatë ditës së premte në Maqedoninë e Veriut u krye transplantimi i parë i mëlçisë nga donatori i vdekur në historinë e shëndetësisë në vendit, bëri të ditur ministri i shëndetësisë, Bekim Sali, përcjell InLajmi .
Sali njoftoi se në klinikën e kirurgjisë Digjestive, një pacient 60-vjeçar me sëmundje kronike të mëlçisë mori një organ të shëndetshëm nga pacientja me vdekje në tru, familja e së cilës kishte pranuar t’i dhurojë organet.
Ai ka falënderuar në emër të gjithë personelit të përfshirë në ndërhyrjen e transplanteve familjen e donatorit për shpëtim jete duke shtuar se shembujt e tillë na tregojnë se jeta mund të dhurohet.
Sali gjithashtu ka falënderuar edhe ekipet mjekësore të përfshira në transplantim duke e veçuar punën e profesorit Zoran Karaxhov dhe stafit të tij.
Postimi i plotë i tij:
Sot, pikërisht në mesditë në Klinikën e Kirurgjisë Digjestive, është kryer transplanti i parë i mëlçisë nga donatori i vdekur në historinë e shëndetësisë në Maqedoni.
Pacienti gjashtëdhjetëvjeçar me sëmundje kronike të mëlçisë mori një organ të shëndetshëm nga pacientja me vdekje në tru, familja e së cilës mbrëmë pranoi t’i dhurojë organet.
Krahas mëlçisë, momentalisht është duke u zhvilluar transplantimi i veshkave në dy pacientë me sëmundje të veshkave.
Në emrin tim personal dhe në emër të gjithë personelit të përfshirë në ndërhyrjen e transplanteve, do të doja të falënderoja familjen e donatorit dhe vendimin e tyre për të shpëtuar jo një, por tre jetë. Ata na treguan edhe një herë se jeta mund të dhurohet.
Falenderojmë gjithashtu të gjitha ekipet mjekësore të përfshira në transplantim, që punuan dhe vazhdojnë të punojnë me pacientët gjatë 24 orëve të fundit. Falënderim të veçantë meriton profesori Zoran Karaxhov dhe ekipi i tij, si dhe ekipi i Klinikës së Gastroenterohepatologjisë, i cili sot shkroi një faqe të re jo vetëm në fushën e kirurgjisë së digjestive, por edhe në shëndetin e përgjithshëm./InLajmi/
