Vrasja e gruas 63 vjeçare në Prishtinë ka nxitur reagime të shumta, ndërsa për këtë ngjarje tronditëse reagon edhe zëdhënësja e LDK-së, Sibel Halimi, cila tha se në ditën e vetëdijesimit ndaj dhunës së grave mëngjesi filloi i trishtë, përcjell InLajmi
Halimi theksoi se nga kjo ngjarje e rëndë duhet të na kujtojë se sa shumë duhet të punojmë si shoqëri për barazi gjinore.
Sipas saj nuk mund të qëndrojmë duarkryq përballë diskriminimit dhe shtypjes së gjinisë femërore.
Anëtarja e LDK-së, thekson se duhet të vetëdijesohemi dhe të shprehim qëndrimet tona karshi grave sepse përndryshe nuk do të eliminohet patriarkalizimi e nuk mund të ndryshojmë veprimet.
Postimi i plotë i saj:
Dita e vetëdijësimit kundër dhunës ndaj grave nisi me mëngjes të trishtë
Në Ditën Ndërkombëtare për Eliminimin e Dhunës ndaj Grave, e cila do të duhej të shërbejë si një përkujtues i radhës për atë se edhe sa shumë duhet të bëjmë si shoqëri për të arritur barazinë gjinore; pikërisht sot, në Prishtinë, vritet një grua në familjen e saj.
Në një vend ku gratë dhe vajzat shihen si objekte, në shërbim, të disiplinuara dhe të kontrolluara nga burrat; në një kohë kur rastet e dhunës, dhunimit dhe privimit nga jeta të grave, janë bërë rëndomtësi e përditshmëri, nuk mund të qëndrojmë duarkryq kur gjysma e popullatës shtypet dhe diskriminohet. Të gjithë duhet të vetëdijesohemi për rëndësinë e gjuhës që shprehim, për qëndrimet tona karshi grave dhe vajzave, ngase pa eliminimin e patriarkalizimit të përbrendësuar nuk mund t’i ndryshojmë veprimet!/InLajmi/
