Koordinatori i Departamentit për Rend dhe Ligj në Lidhjen Demokratike të Kosovës, Shkëmb Manja tha të enjten në konferencë për media se goditja më e madhe iu bë sistemit të drejtësisë nga Qeveria me vendimin për uljen e pagave të prokurorëve e gjyqtarëve, raporton InLajmi.
Ai tha se e vetmja është Qeveria e Kosovës e cila në kohë krize e inflacioni ulë pagat.
Sipas tij ky vendim do të ndikoj në ikjen e prokurorëve e gjyqtarëve nga sistemi si dhe ngadalësimin e trajtimit të rasteve.
“Dje qeveria e Kosovës i dha goditje sistemit tonë të drejtësisë, në momentin kur ne ishim në pritje të vendimmarrjes për rritjen e pagave në sektorin publik, ndodhi e kundërta, qeveria i uli pagat. Kjo qeveri është e vetmja në botë, që në kohën e inflacionit të lartë i ul pagat. Ulja e pagave për gjyqtarët dhe prokurorët, si dhe për anëtarët e Gjykatës Kushtetuese të Kosovës, është njëra nga goditjet më të mëdha të kësaj qeveria që i ka dhënë institucioneve të pavarura kushtetuese”, tha Manaj.
Sipas tij, vendimi për uljen e pagave të zyrtarëve të drejtësisë është skandaloz dhe cenon sistemin.
“Vendimi skandaloz i qeverisë, cënon punën edhe ashtu të cënuar të sistemin tonë të drejtësisë, i cili po goditet në të gjitha anët. Ulja e pagave nënkupton ikjen e gjyqtarëve dhe të prokurorëve profesionist nga sistemi ynë i drejtësisë”, u shpreh koordinatori Manaj.
Tutje ka shtuar Manaj se ulja e pagave vetëm sa shton ”apetitet” për korrupsion në drejtësi.
“Ulja e pagave nënkupton ngadalësimin e zgjidhjeve të rasteve në sistemin tonë të drejtësisë, edhe poashtu që janë të vonuara për qytetarët e Republikës së Kosovës. Ulja e pagave, nënkupton stimulim të korrupsionit në sistemin tonë të drejtësisë. Ulja e pagave është goditje për vendosjen e rendit dhe të ligjit në shtetin tonë”, tha Manaj./InLajmi/
