Deputeti i AAK-së, Besnik Tahiri ka reaguar pas vendimit të qeverisë për uljen e pagave ndaj gjyqtarëve dhe prokurorëve, sipas tij ky vendim është anti-kushtetues, përcjell InLajmi.
Tahiri tha se vendimi për rritjen e pagave në sitemin e drejtësisë ka qenë vendim edhe i Qeverisë Haradinaj, jo vetëm i Gjykatës Kushtetuese.
Sipas tij është ironike fakti që ky vendim i qeverisë Kurti, u bë në emër të ligjshmërisë në vend, por që nuk është i tillë.
Postimi i plotë i tij:
Vendimi Anti-Kushtetues!
Sot, Qeveria prishi vendimin e Qeverisë Haradinaj për rritjen e pagave në sistem të drejtësisë. Kjo u bë në mënyrë kundërkushtetuese, sepse vendimi Qeverisë Haradinaj me një vendim të Gjykatës Kushtetuese ngeli në fuqi. Për pasojë, më nuk bëhet fjalë për vendim të Qeverisë Haradinaj, por për vendim të Gjykatës Kushtetuese, i cili mund të ndryshohet vetëm nga Gjykata Kushtetuese, apo me amandament kushtetues të përfaqësuesit të sovranit të Kosovës.
Për të qenë ironia më e madhe, ky vendim antikushtetues që shfuqizojë një vendim të Gjykatës Kushtetuese bëhet në emër të kthimit të ligjshmërisë në vend! Imagjinoni, Qeveria si organ politik me një vendim administrativ shfuqizon një vendim të Gjykatës Kushtetuese dhe këtë e bën në emër të rivendosjes së ligjshmërisë.
Ekziston një praktikë e Komisionit të Venecias dhe një standard kushetetues që thotë se pagat e sistemit të drejtësisë mund të ulen vetëm në rast të një krize e recesioni të rëndë ekononik e financiar, të vlerësuar gjërësisht nga faktorët e brendshëm dhe të jashtëm. Në Kosovë, ky nuk është rasti! Së paku jo për momentin! Këtë që e thotë Komisioni i Venecias, e gjejmë jo rrallë në dispozita kushtetuese të vendeve ish-komuniste, si një garanci kushtetuese. Përtej kësaj, Komisisioni i Venecias ka thënë se ulja e pagave në mënyrë arbitrare dhe pa provuar se vendi gjendet në krizë të rëndë ekonomike dhe financiare, përbën ndërhyrje brutale në sistemin e drejtësisë.
Bëjmë thirrje te deputetët dhe te Avokati Popullit që këtë vendim arbitrar dhe hakmarrës ndaj sistemit të drejtësisë ta dërgojnë në Gkykatën Kushtetuese për kontroll kushtetues dhe rivendosjen e kushtetutshmërisë në punën e sistemit të drejtësisë./InLajmi/
