Zëdhënësja e LDK-së, Sibel Halimi ka reaguar lidhur me vendimin e fundit për targa, duke theksuar se paqja dhe siguria duhet të jenë prioritet në këto rrethana politike në të cilën gjendet vendi ynë, përcjell InLajmi.
Halimi tha se sado e rëndësishme të jetë çështja e targave, qeveria duhet të tregoj maturi karshi aleatëve por edhe të veprojë në frymë paqësore.
Tutje, ka shtuar anëtarja e LDK-së se qytetarët duan një kryeministër të hapur për informimin e rrjedhës së dialogut.
Halim tha se kryeministrit Kurti duhet të negocioj në emër të popullit , duke i kujtuar këtij të fundit historinë e dhimbshme që ka kaluar populli sikur edhe krijimin e aleancave strategjike që edhe sot i kemi .
Postimi i plotë i saj:
Paqja dhe siguria duhet të jenë prioritet në këto rrethana politike në të cilën gjendet vendi ynë. Sado që në pamjen e parë duket e rëndësishme çështja e targave, është e pakrahasueshme me maturinë që duhet të tregoj qeveria karshi jo vetëm aleatëve tanë, por edhe frymën paqësore që duhet ta ruaj.
Gjuha e kujdesshme e përafruese, sjell normalitetin që na duhet aq shumë. Janë urtësia në udhëheqje, maturia në qëndrime dhe largpamësia në vendimmarrje, ato që e ruajnë dhe e zhvillojnë shtetin. Ndërsa ‘patriotizmi’ folklorik e virtual është dritëshkurtër, pasojat e së cilit mund të mos i ndjejmë sot, por më vonë.
Qytetarët e Kosovës kanë nevojë për një kryeministër që në radhë të parë është transparent, dhe i informon ata se kah po shkon procesi i dialogut. Së 2-ti, kryeministri duhet të negocioj në emrin tonë, duke e pasur parasysh gjithë historinë tonë të dhimbshme në të cilën kemi kaluar si popull, nga ku i kemi krijuar aleancat strategjike që i kemi sot. Këto aleanca nuk janë të mirëqena, nuk janë të garantuara. Ato duhen ruajtur dhe mirëmbajtur, duke ndërtuar raporte bashkëpunimi me aleatët tanë, SHBA e BE.
Ndaj, në esencë, njohja reciproke, sovraniteti dhe ruajtja territoriale do ta krijonte domosdoshmërisht edhe implementimin e idesë së targave, është logjikë e kauzalitetit shkak- pasojë. Rrjedhimisht, do të duhej që targat të pezullohen, para se të fillonte takimi në Bruksel.
Duke u krijuar një situatë e tillë, kemi transformim të imazhit të politikës serbe në sytë e partnerëve ndërkombëtarë, nga agresor në viktimë e kjo kurrsesi nuk duhet të ndodhë./InLajmi/
