Ministrja e Arsimit Arbërie Nagavci në shënimin në Ditën Ndërkombëtare për të Drejtat e fëmijëve ka thënë se çdo fëmijë duhet të arsimohet dhe të edukohet, pëcjell InLajmi.
Nagavci tha se të gjithë së bashku duhet të luftojmë që të parandalojmë braktisjen e shkollave nga fëmijët.
Ajo ftoi të gjitha institucionet përgjegjëse, që bashkë me komunitetin e prindërve dhe grupet tjera të interesit të mobilizohen në parandalimin e secilit rast të braktisjes së shkollimit dhe problemeve të tjera me të cilat ballafaqohen fëmijët.
Postimi i plotë i tij:
Secili fëmijë duhet të edukohet, arsimohet e zhvillohet ashtu siç e parasheh Konventa e të drejtave të fëmijëve dhe kuadri ynë ligjor.
Sot shënohet Dita Ndërkombëtare për të Drejtat e fëmijëve. Si Ministri e Arsimit po fillojmë një fushatë që ka për qëllim ofrimin e mundësive të barabarta për të gjithë fëmijët pa asnjë dallim.
Pra, po fillojmë Javën kundër braktisjes së shkollimit me të cilën synojmë parandalimin dhe reagimin ndaj braktisjes dhe mosregjistrimit të shkollës.
Kësaj Jave i kanë paraprirë vizitat e shumta në komuna dhe shkolla, seanca kundër braktisjes dhe dhunës. Gjithashtu do të organizohen tryeza diskutimi në pesë rajone, ku do të shpërndahet broshura promovuese e sensibilizuese kundër braktisjes.
Do të ketë edhe shpërblime për shkollat që raportojnë me rregull për rastet në rrezik të braktisjes dhe të dhunës në shkolla.
Ftoj të gjitha institucionet përgjegjëse, që bashkë me komunitetin e prindërve dhe grupet tjera të interesit të mobilizohemi në parandalimin e secilit rast të braktisjes së shkollimit dhe problemeve të tjera me të cilat ballafaqohen fëmijët.
Mbesim të përkushtuar që të kemi shkolla cilësore, mike, e të sigurta për të gjithë.
Vetëm me angazhim të përbashkët mund të realizojmë të drejtat e çdo fëmije në Republikën e Kosovës./InLajmi/
