Sulmuesi i Francës, Karim Benzema, është jashtë Botërorit 2022 në Katar pasi pësoi një dëmtim në kofshë në stërvitje, transmeton InLajmi.
Benzema fitoi Topin e Artë 2022, që iu dha lojtarit të vitit në futbollin botëror, pasi ndihmoi Real Madridin të fitonte Ligën e Kampionëve dhe La Ligën.
Kombëtarja franceze tha se ai kishte vuajtur një problem në kofshë dhe nuk do të mund të luante në turne.
“I gjithë ekipi ndan trishtimin e Karimit dhe i uron atij një shërim të shpejtë.
Federata Franceze e Futbollit tha se një skanim MRI konfirmoi një dëmtim të muskujve të kofshës “i cili do të kërkojë një periudhë rikuperimi 3 javore”.
Franca është në Grupin D dhe luan me Australinë më 22 nëntor, Danimarkën më 26 nëntor dhe Tunizinë më 30 nëntor.
Trajneri Didier Deschamps ka afat deri të hënën për të emëruar një zëvendësues dhe dëmtimi i 34-vjeçarit Benzema, i cili ka shënuar 37 herë në 97 ndeshje për Francën, është një tjetër goditje për titullarët e Botërorit.
Ata tashmë janë pa mesfushorët Paul Pogba dhe N’Golo Kante për shkak të lëndimit, ndërsa mbrojtësi i Manchester United, Raphael Varane po përpiqet të jetë i aftë për të luajtur pasi ka humbur 5 ndeshjet e fundit të klubit.
Të mërkurën, sulmuesi i RB Leipzig, Christopher Nkunku u përjashtua nga turneu pasi u largua me çalë nga stërvitjet, me Randal Kolo Muani të Eintracht Frankfurt të thirrur si zëvendësues.
Sulmuesi i Manchester United, Anthony Martial, është një nga opsionet e mundshme që mund të hyjë për Benzemën, i cili po luftonte me një problem në kofshë që nga tetori.
Lojtari i Real Madridit kishte luajtur më pak se gjysmë ore në 6 ndeshjet e fundit të klubit të tij.
Ai iu nënshtrua testeve mjekësore pasi u largua nga stërvitjet i dëmtuar të shtunën, ishte hera e parë që ai merrte pjesë në seancë të plotë stërvitore që kur skuadra e Kupës së Botës u mblodh javën e kaluar.
“Jam jashtëzakonisht i trishtuar për Karimin që e bëri këtë Botëror një objektiv madhor”, tha Deschamps, shkruan BBC.
“Megjithë këtë pengesë të re, unë kam besim të plotë në grupin tim. Ne do të bëjmë gjithçka për të përballuar sfidën e madhe që na pret.” /InLajmi/
