Ministri i Mbrojtjes, Armend Mehaj, ka mbajtur një takim me senatorët amerikanë Jeanne Shaheen, Kirsten Gillibrand dhe Mike Rounds, të cilëve ua shprehu gatishmërinë e FSK-së për pjesëmarrje nëpër misionet e NATO-s, përcjell InLajmi.
Një gjë të tillë e ka bërë të ditur vetë Mehaj nëpërmjet një postimi në ‘Facebook’, duke shtuar se ka njoftuar senatorët amerikanë edhe për implementimin e Planit të Tranzicionit të FSK-së.
“Jemi të angazhuar maksimalisht që si shtet të të ruajmë paqen dhe stabilitetin, të ofrojmë mbrojtje dhe siguri, andaj i njoftova dhe për buxhetin që është ndarë në këtë drejtim, për avancimet e Ushtrisë së Republikës së Kosovës sa i përket implementimit të Planit të Tranzicionit, ngritjes së kapaciteteve profesionale dhe operacionale përmes bashkëpunimit të pandërprerë me shtetet aleate në trajnime e misione të përbashkëta”, ka deklaruar ai.
Gjithashtu, Mehaj ka bërë të ditur se Kosova shpreh gatishmëri për strehimin e ukrainasve, si dhe trajnimin e ushtarakëve ukrainas nga ana e FSK-së.
“Strehimi, sigurimi i transportit për refugjatët afganë, gatishmëria jonë për të strehuar refugjatë ukrainas, dhe për të trajnuar ushtarakët ukrainas në fushën e deminimit dhe kërkim-shpëtimit si dhe gatishmëria e FSK-së për të marrë pjesë në çdo mision tjetër të NATO-s, ishin disa nga çështjet të cilat u vlerësuan nga ana e senatorëve si hapa të rëndësishëm të një shteti që përqafon vlerat evropiane dhe aspiron anëtarësimin në NATO dhe BE”, thuhet ndër të tjera në postimin e ministrit të Mbrojtjes.
“Ashtu si çdoherë dhe gjithmonë, rikonfirmuan përkrahjen e pakursyer për Republikën e Kosovës, si shtete mike që na bashkon historia dhe na shoqëron bindja e thellë e sundimit të vlerave demokratike dhe lirisë së popujve”, përfundon postimi i tij./InLajmi/
