Komisioni Qendror i Zgjedhjeve ka kufizuar shpenzimet e subjekteve politike për fushatën në zgjedhjet e jashtëzakonshme në veri të vendit.
Sipas KQZ-së, ky vendim përcakton kufirin e sipërm të shpenzimeve të fushatë zgjedhore për subjektet politike që do të certifikohet për pjesëmarrje.
“Ky kufizim mbështetet në Rregullën Zgjedhore nr.12/2013, sipas të cilës kufizimi i shpenzimeve të fushatës do të jetë 0.5 euro për votues të regjistruar në secilën komunë. Vendimi i KQZ-së mbështetët në të dhënat jo- përfundimtare të listës së votuesve në këto komuna”, thuhet në njoftimin e KQZ-së
Më tej, KQZ-ja ka bërë të ditur se një parti ka të drejtë të shpenzojë deri në 9.000 euro, e që në këtë rast është fjala për Mitrovicën e Veriut, që ka 18.045 votues.
Për Leposaviq, një parti politike e certifikuar për të marrë pjesë në zgjedhje ka të drejtë të shpenzojë deri në 6.646 euro, pasi kjo komunë ka 13 293 banorë.
Për Zubin Potok, tavani i lejuar për shpenzime gjatë fushatës do të jetë 3. 318 euro, meqë në këtë komunë janë 6.636 votues, transmeton Klankosova.tv.
Ndërsa, njëjtë do të jetë edhe Zveçani, ku shpenzimet maksimale të lejuara do të jenë 3.490 euro, pasi kjo komunë numëron 6.980 votues.
