Nënkryetari i Sindikatës së Punëtorëve Shëndetësor, Enlirat Duraku ka folur për kërkesën për dorëheqjen e Ushtrueses së Detyrës së drejtoreshës së Shërbimi Spitalor Klinik Universitar të Kosovës, Pranvera Zejnullahu-Raçi.
Duraku thotë se kjo kërkesë nuk vjen për shkak të tekeve, por për shkak të akumulimit të pakënaqësive.
“Kjo kërkesë nuk vjen për shkak te tekave, por për shkak të akumulimit të pakënaqësive të cilat ne si organizatë sindikale na parashtrohen dita ditës, të cilat janë si qarkorja e jashtëligjshme e cila është ndërhyrje dhe risi në përshkrimin e detyrave të infermierëve. Pastaj e njëjta menaxhere shkon edhe më tej kur e injoron edhe një kërkesë të ish-ministrit Latifi dërguar Bordit të SHSKUK-së që këto urdhërsa të rishqyrtohen apo anulohen deri në një zgjidhje përfundimtare me lidershipin e infermierëve”, ka deklaruar ai në emisionin “Ditari” në Tëvë1.
Po ashtu, Duraku tha se Zejnullahu-Raçi nuk merr as mundin që përmes kanalit zyrtar të komunikimit të kthejë përgjigje.
“Problemi qëndron që nuk e merr mundin as që përmes postës elektronike, që është kanal zyrtar i komunikimit, me kthy një përgjigje. Në si organizatë dhe si infermier jemi të injoruar totalisht”,shtoi tutje ai.
Sipas tij, zhvillimet në veri ia kanë pamundësuar që të marrin masa sindikale dhe t’ia mundësojnë menaxhmentit të SHSKUK-së avazin e vjetër që është abuzimi, shkruan teve1.info
“Zhvillimet në veri neve na kanë pamundësuar moralisht ndërmarrjen e veprimeve dhe masave sindikale dhe në anën tjetër për fat të keq ia ka mundësuar menaxhmentit të SHSKUK-së që vazhdojnë me avazin e vjetër që është abuzimi me autoritet pozitë dhe pushtet dhe injorimit total të komunitetit infermieror”,përfundoi Duraku.
