Presidentja e Republikës së Kosovës, Vjosa Osmani, ka marrë pjesë në 100-vjetorin e themelimit të lëvizjes Paneuropa, përcjell InLajmi.
Osmani tha se themelimi i lëvizjes Paneuropa është lëvizje e cila ka mbështetur popullin e Kosovës në vitet më të vështira të saj në vitet e 90-ta, ku ka kujtuar kohën e Otto von Habsburg si mik të rëndësishëm të Kosovë.
Ajo gjithashtu shtoi se Paneuropa vazhdon të jetë platformë e fuqishme për një Evropë të Bashkuar dhe paqësore, duke theksuar se është shumë e rëndësishme që Evropa po dëshmon vendosmëri.
Postimi i plotë i saj:
Në 100-vjetorin e themelimit të lëvizjes Paneuropa, pata nderin t’i drejtohem lëvizjes më të
vjetër evropiane për një Evropë të bashkuar politikisht dhe ekonomikisht.
Paneuropa e ka mbështetur popullin e Kosovës në kohët më të vështira, në vitet ’90, kur Otto von Habsburg, një mik i madh i Presidentit Rugova dhe i popullit tonë, u bë një nga kampionët më të fortë që avokonte për t’i mbrojtur të drejtat dhe liritë e njeriut në Kosovë.
Edhe pas një shekulli veprimtarie, Paneuropa vazhdon të jetë platformë e fuqishme për një Evropë të bashkuar, të lirë dhe paqësore.
Sa më shumë i kultivojmë vlerat të cilat i promovon kjo organizatë, aq më shumë do të ketë stabilitet, demokraci dhe paqe në Evropë.
Para miqve të Paneuropës theksova se, është tepër e rëndësishme që Evropa po dëshmon vendosmëri, duke qëndruar e bashkuar përballë agresionit, tiranisë dhe autokracisë.
