Gjendja në spitalet e Kosovës nuk është hiq e mirë. Me kushte jo të mira po përballen institucionet shëndetësore.
E kjo po i shtynë edhe të lënë vendin e tyre të punës, gjë që po rrezikon mbylljen e klinikave.
Në situatë të vështirë është edhe Klinika e ORL në Qendrën Klinike Universitare të Kosovës.
Mësohet se kjo klinikë është në prag të mbylljes. Kjo pasi që 3 mjekë e kanë lënë vendin e punës.
Këtë e ka thënë edhe drejtori i kësaj Klinike, Arsim Behramaj.
“Në disa reparte, mjekët e kanë lëshu klinikën kanë shkuar në privat. Punën e kanë lëshuar 3 mjekë, këto kohët e fundit 3 e kanë lëshu. Këta kanë qenë në repart të fytit dhe në repart të fëmijëve, me lënë punën edhe ndonjëri prej neve po rrezikohet mbyllja e ORL-së, normal që mbyllet nuk ka kush punon”, deklaroi ai.
Ndërsa anesteziologë, Behramaj thotë se janë vetëm 2.
“Për anesteziologë nuk është keq, 2 janë, kundrejt klinikave tjera ne mirë i kemi punët”, thaBehramaj për Front Online.
Por jo vetëm, ORL, në QKUK po rrezikohen edhe klinikat tjera.
Enlirat Duraku, përfaqësuesi i Shoqatës Sindikale të Punëtorëve të QKUK-së, tha se kjo po ndodh për shkak të keqmenaxhimit.
“Ajo që e di prej QKUK-së, jo vetëm ORL, por edhe shërbimet tjera janë duke u rreziku në mungesë të personelit shëndetësorë, si të mjekëve, por edhe të infermierëve, për shkak të keqmenaxhimit dhe të njerëzve kompetent kur janë në krye të SHSKUK-së”, u shpreh Duraku.
Sipas Odës së mjekëve, vetëm këtë vit janë 185 mjekë që janë larguar nga Kosova për në vendet perëndimore. Megjithatë, mungesa më së shumti po vërehet tek anesteziologët.
