Kryetari i PDK-së, Memli Krasniqi, ditën e enjte ka njoftuar se është takuar me ish-ambasadorin William Walker, gjatë vizitës së tij në Shtetet e Bashkuara të Amerikës, përcjell InLajmi.
I shoqëruar nga bashkëpartiakja e tij, Vlora Çitaku, i pari i PDK-së ka disa ditë që ndodhet në Amerikë dhe po zhvillon takime të njëpasnjëshme me zyrtarë të lartë shtetëror.
Takimi me Walker duket që e ka gëzuar tej mase Krasniqin, pasi ai shkruan se ish-ambasadori amerikan ka kontribuar në njohjen dhe të vërtetën e Kosovës dhe se populli kosovar do të jetë përjetësisht mirënjohës ndaj tij.
Postimi i plotë i tij:
Gjatë vizitës në SHBA, takuam edhe mikun e madh të Kosovës, ambasadorin William Walker. Kontributi i tij për të vërtetën dhe të drejtën e Kosovës është historik, i paharrueshëm dhe do të gëzojë përjetësisht mirënjohjen dhe falënderimin tonë të plotë.
Është gjithmonë kënaqësi dhe nder i jashtëzakonshëm takimi dhe biseda me të! /InLajmi/
