Kameramani i portalit “Insajderi”, Jetmir Muji, është sulmuar të enjten paradite në Mitrovicën e veriut nga një grup i serbëve lokalë, derisa ishte duke xhiruar për një emision, përcjell InLajmi.
Ndaj këtij sulmi, ka reaguar Asociacioni i Gazetarëve të Kosovës, ndërsa janë shprehur se sulmi i tillë është shqetësues dhe tronditës, për çka edhe kërkojnë nga Policia hetim urgjent të rastit.
AGK-ja, kërkon që sa më shpejtë të identifikohen përgjegjësit e sulmit ndaj kameramanit Jetmir Muji.
Postimi i plotë i AGK-së:
AGK-ja e dënon ashpër sulmin ndaj kamermanit, Jetmir Muji në veri të Mitrovicës
Kameramani i portalit “Insajderi”, Jetmir Muji, është sulmuar sot paradite në Mitrovicën e veriut nga një grup i serbëve lokalë, derisa ishte duke xhiruar për një emision.
Sipas kësaj medie, Muji bashkë me gazetarin, Visar Duriqi, kanë qenë në veri për të përgatitur një emision, kur kanë parë futjen në veturë të një të riu nga disa persona. Kur Muji e ka xhiruar ngjarjen, ai është sulmuar nga këta persona, dhe ka përfunduar në Emergjencën e Spitalit në jug të Mitrovicës.
AGK-ja shpreh shqetësim dhe tronditje me sulmin, njëherësh e fton Policinë e Kosovës, që ta hetojë me urgjencë rastin dhe t’i identifikojë personat përgjegjës./InLajmi/
