Haki Abazi, deputet i Vetëvendosjes ka kritikuar në seancën e së enjtes qeverinë që udhëheq shefi i partisë së tij, derisa ka folur për Projekt-Buxhetin e vitit 2023, me ç’ rast theksoi se në buxhet duhet të përfshihen me veçanti disa kategori sikur që është sigurimi për policët, raporton InLajmi.
Tutje tha Abazi se diskutimi për buxhetin është thelbësore, sepse tha ai kam pasur vërejtje dhe pakënaqësi lidhur me planifikimin e linjave buxhetore
“Edhe buxheti shënon pikërisht këtë moment dhe kjo është arsyeja pse edhe unë sot jam këtu, përkundër faktit që i kam shpreh edhe publikisht pakënaqësitë e mia edhe për prioritetet, por edhe për sukseset e limituara në dikastere të ndryshme”, tha Abazi.
Sipas tij, në projektbuxhet duhet të përfshihen kategoritë me prioritet.
“Unë dua t’i shkoqis disa çështje që duhet të jenë prioritet. Sigurimi jetësor për policët e Kosovës. 20 vite pas luftës, 14 vite pas pavarësisë është e pakuptimtë që shteti ynë të vazhdojë të ketë policë që nuk kanë sigurim jetësor”, theksoi deputeti Abazi, duke shtuar se derisa në vend kemi një krim e korrupsion policia është përher e rrezikuar..
“E 2-ta, janë minatorët që janë futur në zgafella për ta shkundur themelin e Jugosllavisë dhe e kanë bërë. Shumica prej tyre jetojnë me 170 euro edhe sot. Është e padrejtë që një minator që ka dhënë gjithçka prej vetes së tij për interesin e shtetit të marrë pagë më pak se një shqiptar i ndershëm që ka qëndruar në pushtet në kohën e Millosheviqit dhe ka arritur kushtin për pension të plotë atëherë me ligj e në mënyrë urgjente që ata njerëz që kanë bërë më shumë se çdokush tjetër, të konsiderohen si kategori e veçantë”, potencoi Abazi.
Deputeti i Vetëvendosjes, vazhdoi me prioritetet e kategorive të shoqërisë, ndërsa tha se në projektbuxhet duhet të planifikohen ndarje buxhetore për deputetët e 2 Korrikut.
“E 3-ta deputetët e 2 korrikut. Një numër i tyre jeton në kushte të vështira, ata duhet të bëhen kategori me ligj në buxhetin e Kosovës, sepse janë njerëzit që kanë shënuar momentin më të rëndësishëm të deklarimit të popullit tonë për liri e pavarësi”, theksoi Abazi.
Abazi vazhdoi tutje me kritika ndaj ekzekutivit të vendit edhe për mungesën e strategjisë për energjinë.
“Dua të them që është fatkeqësi të miratojmë buxhetin kur s’kemi strategji të energjisë së miratuar”, u shpreh Abazi duke shtuar se gjendja me energji edhe tani është e njëjta sikur në qeverisjet e kaluara./InLajmi/
