Anëtarja e LDK-së, Sibel Halimi, tha se Ministrja e Punëve të Jashtmë dhe Diasporës, Donika Gërvalla – Schwarz është treguar jodiplomatike në reagimin e saj për rastin e hudhjes së 2 raketave në territorin polak, përcjell InLajmi.
Për më tepër, Halimi e cilëson si veprim të ngutshëm të ministres së jashtme dhe ka cilësuar se veprimi i saj i ka hedhur “benzinë zjarrit”.
Anëtarja e LDK-së potencoi se gabimet e tilla që po bëhen nga politikanët tanë pa konsultim me këshilltarët e tyre po e vë Kosovën e pozitë të pafavorshme në politikën ndërkombëtare.
Kujtojmë se Gërvalla – Schwarz kishte “akuzuar” Rusinë për gjuajtjen e raketave në Poloni dhe kishte kërkuar nga NATO që të ndërmarrë masa ndaj Rusisë.
Postimi i plotë i saj:
Është e pafalshme që e para e diplomacisë sonë të jetë kaq jodiplomatike dhe tërësisht e pakujdesshme në reagimet e saj. Në një kohë kur të gjithë zyrtarët e ShBA-së, BE-së dhe të NATO-s rezervohen në deklarime – që të mos ketë përshkallëzime dhe pasaktësi – ministrja jonë e jashtme tregohet joserioze, madje me një dëshirë të papërmbajtshme për t’i hedhur benzinë zjarrit. Përpos lëshimeve teknike e ngatërrimit të flamujve të shteteve, angazhimit të vobektë të njohjes së Kosovës, gabimet përmbajtësore e deklarimet pa takt, sikur ky i fundit, janë bërë rëndomtësi.
Kabineti i madh e me shumë këshilltarë, duhet të angazhohen dhe të konsultohen, para se të bëhen të tilla gabime të panevojshme. Politika, dhe sidomos diplomacia, bëhet me vetëpërmbajtje e maturi, jo me temperament e vrull për t’u deklaruar, duke e vënë kësisoj shtetin tonë në pozitë të pafavorshme në politikën ndërkombëtare. /InLajmi/
