Arben Mustafa, Koordinatori i Departamentit për Financa në Kabinetin për Qeverisje të Mirë të Partisë Demokratike të Kosovës , ka hedhur kritika ndaj Qeverisë për mungesë vizioni në hartimin e Projekt-Buxhetit për vitin 2023, duke theksuar se ashtu siç është hartuar buxheti nuk adreson nevojat e qytetarëve, raporton InLajmi.
“Ky buxhet më së shumti mund të quhen një kopje e dobët e vitit 2022, sepse në shumicën e rasteve është një përsëritje e vitit 2022. Këtij buxheti i mungon ambicia zhvillimore, i mungon orientimi se ku do të jetë Kosovë në fund të vitit 2023, se çfarë Kosove do të kemi në fund të vitit 2023”, tha Mustafa të mërkurën në një konferencë për media.
Tutja ka theksuar Mustafa se Projekt-Buxheti gjithashtu nuk ka një strategji zhvillimore afatgjate.
“Kjo Qeveri assesi nuk po mundet të dalë me një vizion konkret që tregon se ku synon ta çojë vendin në vitet e mbetura të mandatit të saj. Nga ajo që po shihet, kjo Qeveri do të mbahet mend vetëm për shpenzime enorme për nisma të pa menduara mirë, me efekte shumë afatshkurtra, të cilat nuk do të lënë gjurmë në rritjen afatgjatë të mirëqenies së qytetarëve të Kosovës”, u shpreh koordinatori Mustafa.
Ndërkohë ai theksoi se Projekt-Buxheti i paraqitur si më i larti ndër vite nuk është rritje nga aktiviteti ekonomik por vjen nga rritja e çmimeve në ekonomi.
“Raporti i projekt-buxhetit ka paraparë një rritje ekonomike prej 5.5% për vitin 2023, që paraqet pothuajse dyfishim të normës së rritjes ekonomike nga viti aktual, e qe nuk përkon me parashikimet e Fondit Monetar Ndërkombëtar dhe Bankës Botërore si institucionet më kredibile e të cilat sugjerojnë se rritja ekonomike në vitin 2023 nuk pritet të jetë më e lartë se rreth 3% ”, theksoi Mustafa.
Për më tepër koordinatori Mustafa foli edhe për parashikimet e rritjes ekonomike, për siç tha ai se parashikimet e fryra janë rrezik në një situatë të brishtë siç janë tani.
“Shembull konkret e kemi vitin 2022, kur kjo Qeveri me fjalë shumë të mëdha kishte prezantuar shifrën e buxhetuar të investimeve kapitale prej mbi 700 milionë euro, ndërsa tashmë kur ka kaluar pjesa më e madhe e vitit 2022, investimet kapitale të realizuara nuk rezultojnë të jenë më të larta se 200 milionë euro. Prandaj, në vend të numrave dhe fjalëve të mëdha, Qeveria e vendit duhet të tregoj se si synon t’i përmirësojë kapacitetet e saj për t’i realizuar ato investime që i ka paraparë në buxhet”, shtoi ai.
Koordinatori Mustafa ka vazhduar me kritika ndaj Qeverisë Kurti, ndërsa ka përmendur projektet e pa përfunduara e sipas tij kostoja e tyre do të jetë më e lartë në vijim të vitit për shkak të rritjes së çmimeve.
“I vetmi dallim është se punët që nuk janë përfunduar në vitin 2022, në vitin 2023 do të duhet të përfundohen me një kosto shumë më të lartë për buxhetin e shtetit për shkak të rritjes së çmimeve të materialeve ndërtimore, gjë e cila nënkupton humbje të parasë publike”, tha Mustafa.
Ai ka bërë të ditur se PDK-ja, ka kërkuar vazhdimisht që Qeveria të ndihmoj qytetarët për shkak të situatës së rënduar sociale si pasoj e rritjes së çmimeve. Sipas tij, ndihma në interes të qytetarëve është edhe rritja e pagave.
“Zgjidhja më e qëndrueshme dhe më e drejtë në këto kushte do të ishte rritja e pagave, pensioneve dhe ndihmave sociale për të paktën aq sa është rritur niveli i përgjithshëm i çmimeve. Mirëpo, duket që Qeveria ka vendosur ta refuzojë këtë ide edhe për vitin 2023, duke qenë se nuk ka planifikuar buxhet që do të mundësonte një rritje të tillë. Me këtë, Qeveria ose ka vendosur të pajtohet me varfërimin e qytetarëve nga rritja e çmimeve, ose ndoshta po planifikon që të vazhdojë praktikën e pakove të njëhershme të ndihmave për kategori të caktuara të qytetarëve, të cilat nuk janë treguar efektive në adresimin e nevojave të tyre”, u shpreh Mustafa.
Tutje, tha se Mustafa se praktikat e deritashme të Qeverisë Kurti në tentim të uljes së pakënaqësisë sociale do të vazhdojnë tutje, ndërsa theksoi ai se duke pasur parasysh faktin se Qeveria ka ndarë 273 milionë euro pa destinim të caktuar, pra mjete që do të ju lihen në dorë Ministrave që t’i shpenzojnë sipas dëshirës se tyre.
“Kjo është e pa precedentë dhe ngritë tepër shumë dyshime se si po menaxhohen paratë e taksave të qytetarëve. Këto para Ministrat do te munden t’i shpenzojnë pa asnjë filtër të mbikëqyrjes nga Kuvendi. Një praktikë e tillë së fundi është kritikuar edhe nga Fondi Monetar Ndërkombëtar që ka kërkuar rritje të transparencës dhe dobisë për qytetarët në procesin e menaxhimit të buxhetit nga Qeveria e Kosovës”, deklaroi koordinatori Mustafa./InLajmi/
