Kryeministri i Kosovës, Albin Kurti ka thënë se Kosova po shënon progres në qeverisjen digjitale, përcjell InLajmi.
Sipas, indeksit të Bankës Botërore të Maturitetit të Teknologjisë në Qeveri (GTMI), shteti ynë është i kategorizuar në grupin B të vendeve me fokus të konsiderueshëm në qeverisje digjitale.
I pari i Qeverisë ka thënë se Kosova ka arritur në 2 vitet e fundit në 48 indikatorë kyç të indeksit që kanë të bëjnë me fushat si sistemet qeveritare, shtytësit kryesorë të digjitalizimit në qeveri dhe ofrimi i shërbimeve publike.
Albin Kurti, tutje ka shtuar se qeveria është duke u angazhuar për të ngritur efikasitetin dhe transparencën e administratës publike.
Postimi i plotë i tij:
Kosova shënon progres në qeverisje digjitale
Në indeksin e Bankës Botërore të Maturitetit të Teknologjisë në Qeveri (GTMI), Kosova është kategorizuar në grupin B të vendeve me fokus të konsiderueshëm në qeverisje digjitale. Rezultatet që janë publikuar sot, tregojnë progresin që ka arritur Kosova në 2 vitet e fundit në 48 indikatorët kyç të indeksit të cilat mbulojnë fushat si sistemet qeveritare, shtytësit kryesorë të digjitalizimit në qeveri dhe ofrimi i shërbimeve publike. Në matjen paraprake të indeksit GTMI për vitin 2020, Kosova ka qenë e kategorizuar në grupin C të vendeve me fokus të kufizuar në qeverisje digjitale.
Përparimi në këtë fushë duhet të shërbejë si inkurajim shtesë për shumë punë që na presin në digjitalizimin e të gjithë sektorëve. Strategjia e re dhe plani i veprimit për qeverisje elektronike që janë duke u përgatitur, do të ofrojnë udhërrëfyesin për avancimin gjithëpërfshirës të digjitalizimit në qeveri.
Digjitalizimi është një prej shtyllave kryesore të planit tonë qeverisës. Jemi të angazhuar për të ngritur efikasitetin dhe transparencën e administratës publike, si dhe për të përmirësuar shërbimet për qytetarë dhe biznese./InLajmi/.
