Kryetari i Aleancës për Ardhmerinë e Kosovës, Ramush Haradinaj, ditën e mërkurë ka mbajtur takim me qytetarët e Junikut, përcjell InLajmi.
Ai në takim me qytetarët ka biseduar rreth marrëveshjes për njohje reciproke ndërmjet Kosovës dhe Serbisë dhe për keqmenaxhimin e qeverisë sa i përket kësaj marrëveshje.
Haradinaj tha se Kurti po mashtron dhe po varfëron qytetarë duke e cekur këtu edhe krizën energjetike përveç asaj ekonomike.
Kryetari i AAK-së shtoi se Aleanca ofron gjithmonë përkrahje për procese pozitive që hapin dyert e Kosovës në NATO duke e arritur sigurinë dhe stabilitetin.
Postimi i plotë i tij:
Në Junik bashkëbiseduam me qytetarët për marrëveshjen për njohje reciproke ndërmjet Kosovës dhe Serbisë dhe shqetësimin e rrjedhave të situatës dhe mënyrës së dobët se si qeveria e ka menaxhuar këtë proces me rëndësi jetike për vendin.
Theksova shqetësimin tim për logjikën qeverisëse të Kurtit, që nuk përkon fare me kohën në të cilën po jetojmë, mashtrimin dhe varfërimin e vazhdueshëm të qytetarëve nga ana e tij, krizën e thellë ekonomike dhe energjetike.
Për hirë të interesave nacionale, Aleanca do të ofrojë përkrahjen e saj për proceset pozitive që hapin dyert tona në NATO dhe na vendosin nën ombrellën e sigurisë dhe stabilitetit.
Përndryshe, një dezertim i mundshëm në këtë situatë, për arsye të ndryshme folklorike, do ta dëmtojë rëndë shtetin dhe kauzën tonë./InLajmi/
