Zëvendëskryeministri i vendit, Besnik Bislimi thotë se Raporti i Progresit i publikuar nga Zyra e Bashkimit Evropian në tetor ka pasqyruar të arriturat e Kosovës.
Sipas tij, në fushën e drejtësisë është bërë më shumë për një vit se sa për një dekadë më parë.
“Ka filluar procesi i Vettingut në bazë të rekomandimeve të Komisionit te Venecias, ka ndodhë miratimi i disa strategjive, pako anti-korrupsion, luftimi i krimit të organizuar, por duhet ta kuptojmë se sundimi i ligjit nuk është diçka që rregullohet brenda një viti apo një mandati qeverisës, diçka që ka degradu për një periudhë të gjatë kohore, do edhe pak kohë më shumë për tu kthyer komplet në binar”, tha ai.
Tutje, ai foli edhe për zhvillimin ekonomik, ku potencoi se shifrat duhet të maten me numra e jo me përshtypje.
Bislimi theksoi për këtë çështje janë duke qarkulluar shumë dezinformata.
“Tek ekonomia mjafton të përmendim zhvillimin ekonomik. Janë duke qarkulluar dezinformata të shumta për atë se në ç’masë statistikat e pasqyrojnë zhvillimin ekonomik. Por duhet të qartësojmë se rritja ekonomike matet me numra, jo me përshtypje. Nuk mund të thuash mua nuk më duket se ka rritje ekonomike, ose mu më duket se ka 5%. Për arsye se kjo reflekton mungesë totale të kompetencës, por ne duhet në vend të saj të bazohemi në atë se çfarë publikojnë të dhënat”, shtoi ai, përcjell teve1.info
Zyra e BE-së në Kosovë dhe Shtëpia e Evropës janë duke diskutuar temën “Raporti i Zgjerimit: Çfarë ka në të për Kosovën?”, panel në të cilin po merr pjesë edhe shefi i Zyrës së BE-së, Tomas Szunyog.
