Kryeministri Albin Kurti gjatë një takimi me ministren për Çështjet e Ekonomisë, Punës dhe Banimit të landit Baden-Wurttemberg të Gjermanisë, Nicole Hoffmeister- Kraut, është shprehur se Kosova është mundësi për invetime gjermane, përcjell InLajmi.
“Me zhvillimet e fundit pozitive në vend, Republika e Kosovës paraqet mundësi të mirë për kompanitë gjermane dhe Parku i Inovacionit dhe Trajnimeve ITP në Prizren është një hapësirë e përshtatshme për këtë qëllim” tha Kurti.
Kryeministria, përmes një njoftimi dërguar mediave, ka njoftuar se takimi ishte “shumë pozitiv”, dhe se kryeministri Kurti foli “për raportet e mira ndërmjet 2 vendeve dhe popujve si dhe për mundësitë e reja të bashkëpunimit, me theks te ato në fushën e ekonomisë dhe shkëmbimeve tregtare”.
“Në një takim shumë pozitiv, kryeministri Kurti foli për raportet e mira ndërmjet 2 vendeve dhe popujve si dhe për mundësitë e reja të bashkëpunimit, me theks te ato në fushën e ekonomisë dhe shkëmbimeve tregtare. Në vitin 2021 eksportet e Kosovës për në Baden-Württemberg janë rritur për 1/3 në krahasim me vitin pararendës, që flet për shtim të bashkëpunimit tregtar. Ai tha se me zhvillimet e fundit pozitive në vend, Republika e Kosovës paraqet mundësi të mirë për kompanitë gjermane dhe Parku i Inovacionit dhe Trajnimeve ITP në Prizren është një hapësirë e përshtatshme për këtë qëllim”, ka thënë Kurti, gjithnjë sipas asaj që citon njoftimi zyrtar.
Ministrja Hoffmeister- Kraut, gjithnjë sipas komunikatës, tha se “ndjehet e lumtur që Kosova ka një shtand impresiv në forumin ‘Global Connect 2022’”.
“Sa i përket marrëdhënieve ndërmjet Kosovës dhe Gjermanisë, ministrja Hoffmeister- Kraut u shpreh se ato janë të forta dhe se është e bindur që mund të thellohen edhe më tej. Ajo tha se Gjermania ka mirëpritur rreshtimin e Kosovës me partnerët e saj evropianë në vendosjen e sanksioneve ndaj Rusisë”, bëhet e ditur nga njoftimi i kryeministrisë.
“Duke e përgëzuar kryeministrin Kurti për reformat e ndërmarra dhe për indikatorët pozitivë ekonomikë, ministrja Hoffmeister- Kraut dha mbështetjen e plotë të saj dhe landit që përfaqëson për punën e Qeverisë. Ajo shtoi se planifikon që në të ardhmen e afërt ta vizitojë Kosovën me qëllim fuqizimin e marrëdhënieve dhe bashkëpunimit dypalësh”, thuhet në fund të njoftimit. /InLajmi/
