Të hënën aktivistët e Organizatës për Rritjen e Cilësisë në Arsim, ORCA-s, Dibran Hoxha dhe Rron Gjinovci, u arrestuan nga policia pas aksionit simbolik në Fakultetin Filozofik, përcjell InLajmi.
Arrestimi i dy aktivistëve u bë i ditur përmes një njoftimi nga organizata ORCA-s, ndërsa theksohet se nuk do të ndalen aktivitetet kundërshtuese ndaj paaftësisë së institucioneve për jetësimin e vendimeve ndëshkuese ndaj autorëve të shkeljeve.
Tutje theksohet në njoftim se kundërshtimet e aktivistëve të ORCA-s, vijnë si pasojë e jo normalitetit kur profesori i dënuar për plagjiaturë vazhdon punën dhe del para studentëve.
Altivistët e ORCA-s, theksojnë gjithashtu se arrestimet nga policia nuk do i ndalin ata që të vazhdojnë luftën kundër plagjiaturës.
Njoftimi i plotë:
Të hënën aktivistët e ORCA-s, Dibran Hoxha dhe Rron Gjinovci, u arrestuan pas aksionit simbolik ndaj plagjiatorëve të shpallur nga Këshilli i Etikës në Fakultetin Filozofik.
Pasi procedurat për vendimin përfundimtar për rastin e plagjiaturës Bujar Dugolli dhe Ardian Kastrati po marrin kohë siç ndodhë rëndon në Universitetin e Prishtinës, kemi vendosur që nga tash e tutje të kalojmë në aktivizëm gueril.
Në të gjitha rastet kur institucionet tregohen të paafta për t’i jetësuar vendimet meritore ndëshkuese për kryesit e shkeljeve, ORCA do të reagojë duke iu pamundësuar kryesve aktivitetin e tyre të përditshëm normal.
Nuk mund të ketë normalitet në situatë jonormale. Është jonormale që një profesor i dënuar për plagjiaturë të vazhdojë të shfaqet para studentëve, prandaj ne po e normalizojmë situatën duke mos lejuar që kjo të ndodhë.
Ne u arrestuam, por do të vazhdojmë luftën kundër plagjiaturës! /InLajmi/
