Pas lajmit të publikuar në disa media se gjoja ushtarët e Togut të Gardës Ceremoniale të FSK-së, ka bërë nderime për të rënët serb të vitit 1912, Ministria e Mbrojtjes, e përgënjeshtron lajmin e tillë ndërsa sqaron se ajo çka është shkruar nuk është aspak e vërtetë, përcjell InLajmi.
Për më tepër Ministria bën të ditur se Orkestra Frymore e FSK-së si dhe Togu i Gardës Ceremoniale kanë qenë të ftuar nga Ambasada franceze dhe gjermane në ceremoninë e nderimit të rënies së ushtarëve francez dhe gjerman, gjatë Luftës së Parë Botërore.
Tutje, thuhet në sqarimin e Ministrisë se pllakat përkujtimore të ushtarëve të rënë nga të 2 kombet janë të vendosura në të njëjtën hapësirë me pllakën e ushtarëve serb të vitit 1912-1918, porse nuk kanë fare lidhje as me periudhën kohore e as me aktivitetin në fjalë.
Njoftimi i plotë nga Ministria:
Në lidhje me lajmin e publikuar nga disa medie se gjoja Togu i Gardës Ceremoniale ka bërë nderime për të rënët serb të vitit 1912, sqarojmë se nuk është e vërtetë.
Me datën 11.11.2022, Togu i Gardës Ceremoniale dhe Orkestra Frymore e FSK-së, me ftesë të Ambasadës franceze dhe Ambasadës gjermane, ka marrë pjesë në ceremoninë e organizuar për të nderuar rënien e ushtarëve francez dhe gjerman, gjatë Luftës së Parë Botërore, në periudhën 1914-1918.
Pllakat përkujtimore të të rënëve të këtyre 2 kombeve, janë të vendosur në një hapësirë të përbashkët me pllakën e të rënëve serb të vitit 1912-1918, por që si ngjarje në periudhë kohore e as me aktivitetin në fjalë nuk kanë asnjë lidhje.
Theksojmë edhe njëherë se Togu i Gardës Ceremoniale ka marrë pjesë si formacion mbështetës i Ambasadës franceze, nën organizimin e tyre, me qëllim nderimin e ushtarëve të rënë francez dhe gjerman.
Pozicionimi fizik i gardistëve tanë është imponuar nga pozita e pllakave memoriale dhe platosë përkatëse, dhe në asnjë formë nuk nderohen të rënët serb.
Ministria e Mbrojtjes dhe FSK nderojnë gjithmonë vetëm popujt mbrojtës të vlera të lirisë, paqes dhe demokracisë dhe assesi ata që kanë qenë faktor destabilizues në secilën etapë dhe autorë të krimeve e terrorit./InLajmi/.
