Ministrja e Drejtesisë, Albulena Haxhiu, është shprehur e shqetësuar sa i përket ndërhyrjeve të brendshme në rastin e njohur si ‘’Brezovica’’ , përcjell InLajmi.
Rasti në fjalë është në hetim që 5 vite dhe si kuadër i hetimeve është lufta kundër korrupsionit, Haxhiu tha se keqpërdorimi i detyrës zyrtare dhe ushtrimi i ndikimit si synim për ti penguar proceset hetimore janë kancer në sistemin e drejtësisë të cilin të gjithë duhet ta luftojmë.
Ajo gjithashtu shtoi se çdo dyshim i arsyeshëm duhet të hetohet jo vetëm si shkelje disiplinore por edhe si vepër penale.
Postimi i plotë i saj:
Me shqetësim të thellë po i përcjell raportimet për ndërhyrjet flagrante në rastin e njohur Brezovica. Hetimet që po zhvillohen në kuadër të këtij rasti janë ndër më të rëndësishmet në luftën kundër korrupsionit që nga shpallja e pavarësisë.
Pavarësisht parimit të prezumimit të pafajësisë, çdo dyshim i arsyeshëm për ndërhyrje në procesin hetimor nga ana e personit zyrtar, duhet të hetohet jo vetëm si shkelje disiplinore, por edhe si vepër penale.
Keqpërdorimi i detyrës zyrtare dhe ushtrimi i ndikimit për të penguar proceset hetimore, përbëjnë një kancer në sistemin tonë të drejtësisë, një kancer të cilit duhet të gjithë së bashku t’i japim fund dhe atë sa më shpejt./InLajmi/
