Kur kanë mbetur 9 ditë që nga fillimi i zbatimit të vendimit për shqiptim të gjobave ndaj ngasësve të vetura me targa ilegale, një aktiviste nga Mitrovica shprehet skeptike që këto gjoba do të paguhen, përcjell InLajmi.
Nerimane Ferizi vlerëson se kjo situatë do të vije për shkak të largimit të serbëve nga institucionet.
E Drizan Shala i ftuar në ka thënë se më 21 nëntor pritet nga strukturat ilegale që t’i sulmojnë institucionet në veri.
Rezistencë të ashpër kishte paralajmëruar Lista Serbe, pas shqiptimit të gjobës së parë për shkak të përdorimit të targave ilegale.
E deri në fillimin e këtyre sanksioneve për të cilat mori vendim Qeveria, kanë mbetur edhe 9 ditë.
Aktivistja e shoqërisë civile në Mitrovicë, Nerimane Ferizi nuk pret eskalim të madh të situatës, megjithëse shprehet skeptike në pagesën e gjobave që mund t’i marrin serbët.
“Sigurisht që ka me pas diçka. Nuk pres diçka të madhe pasi që serbët përderisa i kanë lëshu institucionet qëkjo duhet me na shqetësu më shumë sesa tash në vazhdimësi, përderisa i kanë lëshu ato institucione nuk pritet që ata me i pagu ato gjoba, sado që shqiptohen”, thotë Ferizi.
Megjithatë, sipas njohësit të çështjeve të sigurisë, Drizan Shala, më 21 nëntor do të ketë tentime në pjesën veriore, për t’i sulmuar institucionet.
“Të merret për bazë kërkesa eksplicite nga SHBA që të mos krijohen situata të palakmueshme, të cilat sipas tyre ka mundësi të eskalojë sepse 21 nëntori është dita ku do të presim veprime konkrete të strukturave paralele në pjesën veriore të cilët do të tentojnë të bllokojnë rrugët kryesore, do të tentojnë të sulmojnë institucionet atje”, vlerëson Shala.
Në mënyrë që të evitohet ndonjë krizë e mundshme, analisti Visar Xani ka thënë në emisionin “InfoNata” se duhet një ndërhyrje ndërkombëtare.
“Për Kosovën këto janë sfida reale dhe nëse nuk do të kemi një ndërhyrje qoftë ndërkombëtare, apo personave me ndikim, atëherë i bie se mund të kemi kriza edhe më të rënda në ditët në vijim, gjë që lehtësisht mund të kalohet kjo situatë dhe lehtësisht të eskalojë”,theksoi ai.
Sipas vendimit të Qeverisë, personat që ngasin vetura serbe me targa ilegale, pas 21 nëntorit do t’ju shqiptohet gjoba prej 150 eurosh. /InLajmi/
