Ka 3 javë që Prokuroria Themelore e Prishtinës nuk ka pranuar asnjë kallëzim penal dhe shkresa, sa i përket rasteve në procedurë të rregullt.
Arsyeja është se po punohet me staf të reduktuar dhe po trajtohen vetëm rastet urgjente, si shkak i mungesës së ajrit të mjaftueshëm brenda këtyre hapësirave.
Zyrtarja për informim e këtij institucioni të drejtësisë, Laureta Ulaj, tregoi se objekti është konstruktuar i atillë që dritaret të mos hapen, por që ajrosja të mundësohet përmes sistemit të ventilimit, sistem ky që nuk po funksionon siç duhet.
Si shkak i kësaj, stafi muaj më parë dhe tani është ballafaquar me probleme të theksuara shëndetësore, të fundit në muajin tetor janë administratorja dhe kryeprokurori i këtij institucioni që pësuan edhe sulm. Po ashtu, edhe një zyrtareje tjetër iu thirr autoambulanca gjashtë herë brenda këtij viti.
E, derisa në prokurori është reduktuar puna, kështu nuk po ndodh edhe në gjykatë që po ashtu është në Pallatin e Drejtësisë dhe po punohet me kapacitete të plota, ani pse telashet i kanë të njëjta si në prokurori, përcjell Gazeta Blic.
Objekti i këtyre institucioneve të drejtësisë menaxhohet nga MPB-ja. Sipas prokurorisë, tek gjatë këtij viti është nënshkruar një kontratë me një operator ekonomik për hapjen e dritareve, veçse një gjë e tillë ende nuk ka ndodhur
