Në ditën e 3-të të konferencës “Java e Regjistrimit të Popullsisë 2023”, e organizuar nga Agjencia e Statistikave të Kosovës ASK, me mbështetjen e UNFPA-së, është diskutuar për procesin e regjistrimit të popullsisë dhe mbështetjen që do të ofroj qeveria në këtë drejtim, raporton InLajmi.
Ndërsa e përshëndeti iniciativën për projektin e regjistrimit, zëvendëskryeministër i Republikës së Kosovës Besnik Bislimi, tha se Qeveria do ta përkrahë këtë proces me mbi 12 milionë euro.
Sipas tij, të dhënat që do të mblidhen me regjistrimin e popullsisë do të përdoren për të krijuar politika më të mira që do të ndikojnë në jetën e qytetarëve.
“Kjo përbën një nga projektet më të rëndësishme për Qeverinë. Të dhënat statistikore krijon bazën e tërë sistemit statistikor dhe përdorën për analiza të ndryshme. Sistemi ynë statistikorë do të zhvillohet edhe më shumë”, tha Bislimi, duke shtuar se përmes të dhënave do të hartohen edhe politikat ekonomike.
“Përmes të dhënave do të marrim me saktësi të dhëna për ekonomi e në shumë fusha të tjera. Shteti këto të dhëna i përdorë për të ndikuar për një jetë më të mirë për qytetarët. Si Qeveri shprehim përkushtimin dhe gatishmërinë që të ofrojmë të gjitha resurset që ASK-ja të përfundojë këtë proces me sukses”, u shpreh zëvendëskryeministri Bislimi.
Ndërsa ka folur për procesin e regjistrimit të mirëqenë për orientim të sakët në krijimin e politikave, Bislimi bëri të ditur se qeveria do të mbështes financiarisht këtë proces për kompletim të statistikave
“Për këtë projekt po ndajmë mbi 12 milionë euro, në mënyrë që në fund të këtij procesi të kemi një sistem të kompletuar të dhënave statistikore. Një rëndësi e veçantë është se regjistrimi i popullsisë do të jetë gjithëpërfshirës dhe kualitativ, për këtë Qeveria do të ofrojë të gjitha mjetet e nevojshme që të jetë një regjistrim i suksesshëm”, theksoi Bislimi.
Nga ana tjetër Emilija Rexhepi, zëvendëskryeministre për Çështje të Pakicave dhe të Drejtave të Njeriut, tha se regjistrimi i popullsisë është i një rëndësie të veçantë për shtetin dhe se të gjithë qytetarët duhet t’i përgjigjen pa marrë parasysh etninë.
“Të gjitha të dhënat do të përdorën vetëm për statistika. Në shtete e Ballkanit ende ekziston mentaliteti se regjistrimi përdoret për politik, si Qeveri do ta ndryshojmë këtë. Duhet të gjithë të regjistrohen, sepse regjistrimi do të jetë i suksesshëm për të gjithë ne. Roli i rëndësishëm në këtë proces e kanë edhe mediat”, tha Rexhepi.
Lidija Brkoviç, nga Enti Shtetëror i Statistikave të Republikës së Kroacisë, në një lidhje online dha detaje për përvojat e regjistrimit të popullsisë në këtë vend.
“Në rastin tonë regjistrimi i popullatës ka filluar në vitin 2021 dhe është kryer në dy pjesë kemi pasur probleme për shkak të pandemisë, pastaj tërmeti. Me 22 shtator të këtij viti kemi publikuar rezultatet përfundimtare. Regjistrimi ka përfshirë 750 regjistrues, 1 000 mbikëqyrës”, deklaroi Brokoviç.
“Pyetësori ka qenë i dizajnuara që të jetë i lehtë për t’u përgjigjur. Ne planifikojmë të përmirësojmë saktësinë e mbledhjes së të dhënave. Kroacia ka vënë në pah regjistrimin e popullatës për vite të tëra”, tha ajo./Inlajmi/
