Ish-kryeministri i Kosovës, Isa Mustafa ka folur për propozimin franko-gjerman që po shihet si zgjidhje për normalizimin e marrëdhënieve mes Kosovës e Serbisë.
Mustafa ka thënë se është ende e paqartë nëse kjo marrëveshje përmban pikërisht 9 pikat që u publikuan të mërkurën, megjithatë ai konsideron se është është hap përpara çdo përpjekje që e çon Kosovën drejt Bashkimit Evropian dhe kontribuon në konsolidimin e plotë të njohjes nga të gjitha vendet e BE-së.
Ish kryeministri thotë se Qeveria e Kosovës duhet ta shfrytëzojë klimën e tanishme, përkrahjen nga SHBA dhe BE të procesit të dialogut dhe të mos ndalet derisa të arrihet njohja reciproke.
“Është e paqartë se a janë këto 9 pika ato që përmban kjo marrëveshje. Sidoqoftë konsideroj që është hap përpara çdo përpjekje që e qon Kosovën drejt Bashkimit Evropian dhe kontribuon në konsolidimin e plotë të njohjes nga të gjitha vendet e BE-së. Kosova duhet shfrytëzojë klimën e tanishme, përkrahjen nga SHBA dhe BE të procesit të dialogut dhe të mos ndalet derisa të arrihet njohja reciproke”, ka thënë Mustafa për Gazetën Online Reporteri.net.
Gjatë ditës së djeshme mediumi evropian “Euroactiv” ka publikuar 9 pika që thuhet të jenë të draftdokumentit franko-gjerman që është propozuar në kuadër të procesit të dialogut Kosovë-Serbi.
Bashkimi Evropian tashmë ka konfirmuar se ka marrë qëndrimet e të 2 palëve në lidhje me këtë propozim.
Gjatë ditës së enjte është paralajmëruar edhe një takim trilateral mes kryeministrit Kurti e presidentit serb Vuçiq, të cilën po marrin pjesë në Forumin e Paqes, me ftesë të Presidentit të Francës, Emmanuel Macron.
Kurti të mërkurën ka paralajmëruar se atje mund të ketë një takim trilateral me Presidentin e Serbisë, Aleksander Vuçiq.
Kryeministri ka thënë se në tavolinë janë 2 propozime, derisa ka shtuar se gjithnjë është i interesuar, për dialog për marrëveshje, për normalizim të plotë të marrëdhënieve ndërmjet Republikës së Kosovës dhe Serbisë, me njohjen reciproke në qendër.
“I kemi 2 propozime në tavolinë: ai imi për kornizën e përgjithshme të marrëveshjes i prezantuar në takimin e 18 gushtit 2022 në Bruksel, si dhe propozimi franko-gjerman që ka mbështetjen e Shteteve të Bashkuara të Amerikës dhe Bashkimit Evropian, i prezantuar nga emisarët Jens Plötner dhe Emmanuel Bonne. Dialogu parimor me të tjerët, sundimi i ligjit njësoj për të gjithë, dhe, paqja e siguria në tërë territorin, shkojnë bashkë”, ka thënë Kurti.
